PM Xanana: Komunidade ne’ebé hetan eviksaun iha direitu hetan indemnizasaun

Tatoli - Hortencio Sanchez & Florencio Miranda Ximenes

DILI, 09 janeiru 2025 (TATOLI) – Primeiru-Ministru (PM), Kay Rala Xanana Gusmão, informa ba komunidade iha kapitál Dili ne’ebé hetan eviksaun iha direitu atu hetan indemnizasaun husi Governu.

“Hotu-hotu hetan, laiha ema ida la hetan indemnizasaun, rekolla ona sira nia konta bankaria, laiha ida dehan duni de’it ne’e laiha,” PM Xanana hateten ba jornalista sira iha Palásiu Prezidensiál Dili, kinta ne’e.

Xefe Governu alerta ba familia uma-ka’in hirak ne’ebé hetan ona eviksaun, maibé seidauk simu indemnizasaun tenke halo karta ba Gabinete Primeiru-Ministru atu buka tuir tanba saida la hetan.

“Sira ne’ebé iha tinan kotuk no tinan agora hetan ona eviksaun mak seidauk simu indemnizasaun hakerek karta mai ha’u, nune’e ha’u bele ko’alia ho Sekretáriu Estadu Asuntu Toponímia no Organizasaun Urbana (SEATOU),” PM Xanana hato’o asuntu ne’e hafoin halo sorumutu ho Prezidente-Republika, Ramos Horta, ohin.

Maibé, PM Xanana dehan Governu atu fó indemnizasaun ba komunidade hirak ne’ebé hetan eviksaun la’ós ho modelu ne’ebé hanesan, maibé sei haree ba tipu uma no sasan sira komunidade nian, nune’e bele selu tuir kondisaun ne’ebé iha.

Entretantu, ekipa konjunta ezekuta serbisu bazeia ba dekretu-lei númeru 3/2024, iha loron 17 Janeiru, alterasaun dahuluk dekretu-lei númeru 33/2008, iha loron 27 Agostu, kona-ba ijiene no orden públiku. Nune’e mós, iha dekretu-lei númeru 51/2016, iha loron 28 dezembru kona-ba lisensiamentu mesajen publisitária, no dekretu-lei númeru 2/2017, iha loron 22 Marsu kona-ba sistema jestaun reziduu sólidu urbanu, inklui dekretu-lei númeru 3/2017, iha loron 22 Marsu kona- ba rejime zona estasionamentu durasaun limitada.

PM Xanana tun direita ba haree familia ne’ebé hetan eviksaun

Entretantu, Primeiru-Ministru mós tuun direta iha terrenu hodi fó orientasaun no apoia Ministru Obras Públikas (MOP), Samuel Marçal ho Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias hodi fasilita família uma-ka’in 288 ne’ebé konstrui uma iha mota Comoro ninin área Fomentu II, bá ida-idak nia munisípiu.

Primeiru-Ministru konsege akompaña prosesu transportasaun ne’e to’o tuku 22:00 otl, no oras- ne’e daudaun fatin mamuk ona inklui Ponte Comoro nia okos.

Xefe Governu konsola família hirak ne’e atu labele konstrui uma iha fatin risku no tenke fila bá munisípiu, ikus mai sira koopera duni, tanba ne’e PM Xanana rasik mak ajuda hiit sasan tula bá kamioneta sira ne’ebé Governu prepara.

Família 288 ne’e, fasilitadu to’o ida-idak nia munisípiu inklui maluk sira ne’ebé mai hosi Rejiaun Administrativa Espesiál Oecusse Ambeno (RAEOA).

Governu hakarak salva família hirak ne’e tanba konstrui uma iha área ne’ebé mak risku tebtebes hosi inundasaun, no realidade hatudu katak iha uma lubuk ida mak mota Comoro lori iha 04 Abril 2021 bainhira akontese udan boot durante kalan tomak.

Foto, Facebook.