DILI: Primeiru MInistru, Kay Rala Xanana Gusmão hakfodak ho kazu tiru ne’ebé akontese iha rezidensia eis Prezidente Repúblika, Francisco Guterres ‘Lu Olo’, iha Farol, Dili, 01 Janeiru 2025 ne’e.
Xefe Governu ne’e hatete, nia nunka tama ba area rezidensia eis PR Lu Olo tanba metin no seguransa maka’as loos.
Maibé, Primeiru Ministru ne’e hatutan, nia admira tanba kilat musan sa’e ba leten hafoin tuun fali mai hodi fura kakuluk uma nian.
"Ha'u la hatene, ami haree tiha ona. Ha'u ne'e soldadu ida ha'u hatene kilat musan ne'e nusa. Ha'u admira mak kilat musan ida sa'e ba leten tuun fali mai, iha fatin seluk mós ha'u rona ida ne'e, imi mak diskute, ata oan ne'e soldadu, kilat mós la hatene kaer tan, ne'ebé la komprende buat ida ne'e," dehan PM Xanana hafoin enkontru semanál ho PR Horta, iha Palásiu Prezidensiál Bairu-Pite, Kinta (09/01).
Maske nune’e, PM Xanana hatete, tenke investiga kazu ne’e hodi bele hatene motivu no kilat musan ne’e kilat saida nian.
"Tenke halo investigasaun, primeiro tenke hatene kilat ne'e kilat saida, tanba ha'u admira, horsehik (Kuarta) loke iha Konsellu Ministru ha'u dehan ‘Waoo.. ha'u mós tauk. Tiru ba leten tama uma kakuluk, nia fura tiha tuun ba fali ne'ebá ne'e mak ha'u dehan ha'u la hatene’, ne'ebé halo la komprende buat ida ne'e, ne'ebé ami sei investiga," katak Xefe Governu ne’e.
Iha fatin ketak, Ministru Defeza, Donaciano Costa Gomes hatete, prosesu ba kazu ne’e iha Polisia Nasionál Timor-Leste ninia responsabilidade.
"Kazu ne'e agora ita nia polísia Nasionál Timor-Leste halo ona investigasaun para hatene akontesimentu tiru ita-nia eis Prezidente Repúblika, Francisco Guterres Lu Olo, nia rezidensia ne'e intensionadu ka la intensionadu,” dehan nia iha nia knar, Fatuhada, Kinta (09/01).
Iha akontesimentu tiru ne’e, nia dehan, bele mós ema balun tiru ba lalehan la ho intensaun mak kilat musan nia kurva ne'e monu kona-ba eis PR nia uma.
"Agora polísia halo tiha investigasaun ba analiza ezame balistika, depois identifika hatene tiha angulu tiru ho tipu armamentu ne'e par depois ita hatene foti konluzaun ida katak iha atentadu ka la'ós atentadu, iha suspeitu ruma ka bala perdida, entaun ita labele halo espikulasaun lai agora, ita hein prosesu investigasaun," katak nia.
Molok ne’e, Xefe Departamentu Investigasaun Kriminal Nasional (DIKN), Superintendente Xefe Polisia João Belo dos Reis hatete, hafoin kazu ne’e akontese DIKN hamutuk ho ekipa tekniku forensiku PNTL ba kedas lokal akontesimentu hodi haree no halo rekontrusaun.
Bainhira halo rekonstrusaun ba fatin akontesimentu identifika katak bala musan iha duni fatin akontesimentu no bala musan ne'e tiru sa’e ba leten no husi tiru sa’e rezulta kalen kuak no kilat musan ne'e monu tuun rezulta plafon mós kuan.
"Bala musan ne'ebé mak monu iha rai ne'e nove mil metru, ita seidauk hatene ida ne'e mai husi kilat tipu ida ne'ebé, mais ita hatene ona katak ne'e nove mil metru entaun ne'e husi kilat kiik, tanba nia ne'e nove mil metru, maibé atu dehan ida ne'e pistola tipu ida ne'ebé Revolver ka pistola Glock ne'e mak ita seidauk hatene, agora ba kazu ida ne'e ami aprezenta ona ba Ministeriu Publiku ho NUC 003/2024 PNSIK," dehan João ba jornalista sira liu husi konferensia imprensa, iha Kuartel Jerál PNTL, Kaikoli (07/01).
Atu identifika bala musan ne'e pretense ba pistola ho tipu saida, DIKN husu ona apoiu ba parseiru sira atu halo ezame balestiku nune'e hatene loloos tipu pistola ne'ebé momentu ema deskoñesidu uza tiru ba eis PR Lu Olo nia rezidensia, tanba Timor-Leste seidauk iha aparellu sufisiente atu halo ezame ba bala musan.
"Entaun ita husu ita-nia parseiru sira atu halo ezame balestiku ba projetil ka bala musan ne'ebé mak ita hetan, ba ita nia parseiru sira se mak atu apoiu halo ezame ba ida ne'e hau labele koalia iha ne'e tanba segredu justisa," informa nia.
Evidensia bala musan ne'ebé mak PNTL rekoila iha fatin akontesimentu ne'e hanesan bala musan PNTL aprezenta ona ba MP.
Ba kazu ne'e, polisia seidauk kaer suspeitu ruma tanba momentu akontesimentu ne'e halo husi ema deskoñesidu nune'e polisia kontinua buka tuir suspeitu ba kazu ne'e.
"Ita seidauk bele hateten kazu ne’e tama ba krime organizadu ka hatete ami ida militar no polisia ne'ebé kaer arma sira ne'e mak dala-ruma tiru sala, ita seidauk hatene ida ne'e, maibé ne'e akontese ona prosesu investigasaun sei justifika, ita servisu maka’as hela atu hatudu verdades husi kazu ne'e," afirma nia.
Tanba ne'e Autoridade Seguransa PNTL husu ba komunidade sira ne'ebé hela besik iha rezidensia eis PR Lu Olo atu koopera ho polisia atu buka tuir suspeitu ba kazu ne'e.
"Ami husu kooperasaun ba see de’it mak hatene kazu ne'e iha kalan nia haree ema ruma tiru arma atu informa ba ami hodi investiga," katak nia.
Sem comentários:
Enviar um comentário
Nota: só um membro deste blogue pode publicar um comentário.