Despeju administrativu: SEATOU apela komunidade Kuluhun hamamuk fatin to’o 09 Fevereiru

Tatoli -  Jesuína Xavier & Cancio Ximenes

DILI, 09 janeiru 2025 (TATOLI)–Sekretária Estadu Asuntu Toponímia no Organizasaun Urbana (SEATOU) hala’o enkontru ho autoridade lokál no komunidade afetadu ba depeju administrativu hodi halo alargamentu Estrada husi Kuluhun ba Fatuahi, iha sede suku Kuluhun, kinta (09/01) ne’e.

Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, hateten ekipa SEATOU fó tempu ba komunidade afetadu sira liuliu uma sira-ne’ebé konstrui iha estrada ibun ne’ebé Governu tau ona markasaun, atu hahú kinta (09 janeiru 2025) to’o 09 fevereiru 2025 ne’e prepara aan atu hamamuk fatin no muda sai.

“Ohin ba oin, to’o 09 fevereiru 2025 ne’e, sira tenke hamamuk fatin ne’ebé dezenu kona-ba Estrada ne’e,” Governante ne’e hateten ba jornalista sira, iha Kuluhun.

Nia hateten, planu alargamentu estrada hahú ohin halo enkontru ho komunidade suku Kuluhun, postu administrative Kristu Rei, nune’e mós aban iha Becora no semana oin iha Câmea nian sa’e ba ba Fatuahi nian ne’e.

“ Ita mai ko’alia ba sira atu bele komprende dekretu lei nú 3/2017 ne’e, atu koopera ho Estadu liuliu Governu atu alarga espasu estrada hodi akumula transporte sira iha Díli laran liuliu estrada husi Kukuhun to’o Fatuahi,” nia dehan.

Tanba, nia dehan, kada tinan iha aumentu transporte ne’ebé labele akumula iha Estrada públiku, tan ne’e Governu hakaas aan fó hanoin no avizu ba populasaun sira, liuliu sira-ne’ebé hela iha estrada boot nia ninin sira-ne’e.

Ekipa konjunta SEATOU sei halo levantamentu dadus atu populasaun bele muda hodi fó biban ba Governu halo alargamentu ba estrada.

Iha fatin hanesan, xefe suku Kuluhun, Deus Dado Martins, relata iha populasaun uma kain 30 mak identifika afeta ba alargamentu estrada.

“Iha tinan kotuk halo ona levantamentu, entaun halo enkontru ho SEATOU no hahú husi ohin ba oin tenke hamamuk fatin. Levantamentu ne’e purvolta uma kain 30 mak afetadu, entre sira iha Raí Estadu no privadu,” nia relata.

Foto, Facebook.