Lu-Olo Ezije Lideransa Tuan Hamutuk Rezolve Problema Povu

Timor Post- Hermenegildo da Costa Tilman & Cesário Sousa

DILI—Prezidente Partidu FRETILIN, Francisco Guterres “LúOlo” ho Sekretáriu Jerál Partidu FRETILIN, Mari Bin Amude Alkatiri, kontinua sadik lider jerasaun tuan sira, atu tuur hamutuk diskute futuru Timor-Leste nian.

“Se maka uluk hamutuk tenke tuur hamutuk para hanoin hamutuk, ne’e dalan uluk maka ne’e, tenke tuur hamutuk atu hanoin hamutuk. Ne’e importante tebes, labele monu iha tentasaun atu dehan demokrasia ne’e mai atu fahe itania objetivu no vontade,” Alkatiri informa ba jornalista sira, iha Salaun Maubai CCLN, eis arte moris Komoro, Sábadu (07/12).

Tuir nia, demokrasia mai atu halo ema ida-idak sai kriativu no innovative liután, nune’e kontribui ba dezenvolvimentu povu no rai ne’e nian.

“Demokrasia mai para halo ita ida-idak atu kriativu no innovative liu, ne’e maka demokrasia ba ita nia rain ida ne’e, la’ós para ita atu kontra malu, ita atu sai innovative no kriativu no mós atu respeita malu bainhira iha diferensa,” esplika Alkatiri.

Nia dehan, iha diferensa importante iha kapasidade atu supera diferensa ka atu rezolve diferensa ne’e tenke ko’alia ba malu.

Iha fatin hanesan, Prezidente Partidu FRETILIN, Francisco Guterres “LúOlo”, preokupa tanbasá maka lider sira la hamutuk hodi hateke ba oin liuliu ba futuru jerasaun sira nian.

“Tanba saida makaita hotu labele hamutuk, lideransa primeira jerasaun nian, segunda to’o terseira jerasaun nian ita hamutuk para assume ita nia pasadu ida, pasivu ho ativu ninian tau hamutuk hodi hateke ba oin husik hela pozitivu ba ita nia oan sira”.

Nia hatutan, tempu komesa la’o baibain lider jerasaun tuan sira komesa idade ba beibeik, no hotu-hotu hamutuk hodi haree ba futuru povu no rai ne’e nian.

Nia nafatin sujere ba lider primeiru no segundu jerasaun sira, atu tuur hamutuk assume responsabilidade, hodi rezolve problema ne’ebé daudaun povu no rai ne’e hasoru.

“Ita konta istória 7 de Dezembru, aban ba fali ita ko’alia dezenvolvimentu, oinsá maka atu hadi’a edukasaun iha ita nia rain oinsá maka ita atu bele hadi’a saúde ba ita nia povu ida ne’e, oinsá maka ita bele harii ekonomia ida sustentavel iha ita nia rain, kestaun sira ne’e hotu maka ita lori nafatin iha ita nia bolsu loroloron hanesan ema polítika”, nia esplika.

Nia konta, memória sira ne’e sai hanesan istória ida ba jerasaun sira tuir mai, hodi hatene oinsá Timor-Leste hetan independénsia.

“Balun hateten dehan, maun boot Xanana laiha, Timor la ukun aan, orasida fali hateten dehan FRETILIN laiha Timor mós la ukun aan loos hotu.Maibé presiza hatene dehan atu maun boot sira hahú husi Doutór Mari Alkatiri ho sira ne’ebé mate ona, ha’u respeitu sira hotu, sira ne’e se maka hakiak, FRETILIN maka hakiak”, nia konta.

Foto, Facebook.