FRETILIN preokupa dezempeñu futebol TL kontinua derrota ho golu barak

TATOLI- Nelson de Sousa & Cancio Ximenes

Deputadu FRETILIN, José da Crus, preokupa ho dezempeñu futeból iha Timor-Leste (TL) ne’ebé kada tinan tinan kontinua derrota ho golu barak bainhira partisipa iha jogu internasionál.

“Akompaña notísia kona-ba desportu, hatudu Timor-Leste lakon ho Tailándia 10-0. Timor lakon ho Tailándia mak tinan ba tinan, tanba ne’e husu ba ministru desportu atu bele haree didi’ak,” Nia levanta liuhusi reuniaun plenária Parlamentu Nasionál (PN), segunda ne’e.

Nia preokupa tanba hanesan iha loron hirak liu-bá, ekipa futeból TL partisipa iha jogu ho Tailándia iha ASEAN Mitsubishi Eletric Cup 2024 ne’e, ekipa Timor-Leste derrota ho golu barak tebes.

Nune’e, presiza iha seriedade haree desportu iha rai-laran, tanba desportu sira-ne’e fó despeza ba Estadu ne’ebé atu lori TL nia naran ba rai-li’ur.

“Ministru Juventude, Despostu, Arte no Kultura (MJDAK) tenke iha kooperasaun ho FFTL hodi haree desportu,” nia dehan.

Presiza iha investimentu iha área desportu ho di’ak, nune’e iha futuru lori timoroan sira-ne’ebé iha ninia talentu hodi reprezenta TL iha rai-li’ur.

Deputadu FRETILIN, Antonino Doutel Sarmento, nafatin hato’o mensajen no enkoraja ba treinadór no liuliu futebolista timoroan sira-ne’ebé joga ona hasoru Tailándia mezmu rezultadu hatudu ita derrota ka lakon ho 10-0.

“Pergunta simples ida-ne’ebé durante ne’e ema hotu hakarak hatene mak seriedade FFTL nian atu lidera futeból TL, tanba istória futeból TL repete beibeik tinan ba tinan, saida loos mak presiza halo atu halo mudansa ba futeból Timor-Leste,” nia dehan.

“Uluk senior sira ba joga ho kondisaun limitadu tebes, tanba fasilidade ladun iha, osan menus no treinadór ladun barak, maibé agora buat hotu iha maibé dezempeñu futebol hanesan de’it,” nia

preokupa.

Tanba ne’e, nia husu atu identifika kauza sira-ne’ebé durante ne’e treinadór no jogadór sira halo, atu nune’e bele hadi’a no dezenvolve futeból iha TL nafatin, no Ministériu Juventude Desportu Arte no Kultura (MJDAK) atu tau matan ba desportu TL.

“Investimentu ida di’ak hasa’e kbiit futebolista timoroan nia fízika, psikolójia, ho treinamentu no iha nutrisaun ne’ebé di’ak no loloos,” nia hateten.

Reprezentante Governu, Liuhusi Sekretáriu Estadu Komunikasaun Sosiál (SEKOMS), Expedito Dias Ximenes, esplika papél MJDAK iha prosesu ne’ebé nia dezenvolve hela desportu, sente katak iha realidade duni bainhira selesaun ekipa futebolista ba rai-li’ur sempre hetan derrota husi golu 8-0 no 10-0, ikus liu mak Timor-Leste lakon ho Tailándia 10-0.

Iha Governu ida-ne’e, MJDAK nia responsabilidade mak oinsá bele prepara no kria kondisaun ba iha modalidade desportu sira no ikus-ikus ne’e situasaun ne’ebé Governu hasoru liu-liu MJDAK mak federasaun sira-ne’ebé iha seidauk iha sira-nia dirijente ne’ebé fiksu no dalabarak laiha duni atensaun oinsá mak sira dezenvolve modalidade sira-ne’ebé iha.

“Se ita ko’alia kona-ba futeból, Federasaun Futeból Timor-Leste (FFTL) oras ne’e daudaun iha hela prosesu oinsá sira bele hadi’a dirijente,” nia dehan.

Nune’e, Governante ne’e dehan, Governu da-sia foin daidaun iha Konsellu Ministru (KM) fó orientasaun ba Ministru Juventude Despostu Arte no Kultura (MJDAK) atu iha 2025 tenke kria atividade kompetisaun la’ós de’it iha Dili ka nasionál maibé husi nível munisípiu to’o Dili, hodi nune’e bele hetan selesionadu ne’ebé di’ak hodi bele tuir selesaun iha nível nasionál.

Tanba iha Orsamentu Jerál Estadu (OJE) 2025 ne’e, Governu tau duni orsamentu atu bele oinsá dezenvolve desportu ba modalidade hotu-hotu, liuliu iha federasaun sira-ne’ebé iha no liuliu fó atensaun makaas ba iha federasaun futeból TL.

Tanba, nia dehan, iha juñu to’p kullu 2025, TL sei sai uma-na’in ba iha jogu juventude CPLP, ida- ne’e KM foin daudaun fó ona orientasaun no kria ona komisaun organizadora nasionál atu bele prepara modalidade.