Xanana apela ba povu atu “haluha buat hotu-hotu” no simu jeneral indoneziu sira ho “laran luak”

Timor Hau Nian Doben

Iha publikasaun ida iha Facebook Primeiru-Ministru, Xanana Gusmão, ne’ebé iha Oecussi ba selebrasaun sira Restaurasaun Independénsia nian iha loron 28, apela ba populasaun enklave nian atu haluha buat hotu-hotu ne’ebé akontese iha pasadu tanba rekonsiliasaun entre Timor- Leste no Indonézia sai ezemplu ba mundu.

Baikenu sira, Prezidente konvida eis generais balun sei mai. Fávor ida, simu ho laran luak bá tanba buat ida iha kotuk iha ona kotuk hodi ikus-mai iha futuro to’o ita-nia oan, ita-nia beioan sira-nia beioan tán labele iha tán problema hanesan uluk,”nia apela.

Xanana Gusmão husu ba povu liu-liu joven sira “bainhira rona informasaun mai hosi parte oioin ne‘ebé dehan katak labele tanba tenke iha justisa, tanba sira óho ida-ne‘e ida ne‘ebá, haluha tiha ida-ne‘e tanba Timor-Leste halo rekonsiliasaun boot tebtebes ida ne‘ebé mak fó ezemplu bá mundu tomak.”

Gusmão defende Indonézia no hatete katak karik invazor sira presiza hetan julgamentu, nasaun sira seluk ne'ebé ajuda iha invazaun ne'e mos tenke tama kadeia.

“Bainhira Indonézia la mai, Amérika la fa’an kilat musan no aviaun, Fransa, Alemaña, Inglaterra no hotu-hotu hakaral ema sira ne’e bá kadeia, hotu-hotu ne’ebe ajuda Indonézia hodi óho ita tenke bá hotu kadeia. Tanba iha mundu ne’e sé maka óho mak bá, sé mak fó kilat la bá. Tanba ida ne’e husu boot atu iha 26 to’o 28 fulan ne’e, maluk sira hosi sorin balun sei mai, ita tenke hatudu Timor-Leste, povu ida ne’e, katak iha maturidade politika. Liu-liu katuas sira hatene hanoin kona-bá sira-nia oan”, dehan.

Xefe Governu husu dala ida tan ba povu atu simu antigu jenerál indonéziu sira ho “laran luak” no “atu taka tilun ba ema sira ne’ebé bosok katak sei iha protestu no katak ema balun bele hetan detensaun”.

Kalkula katak durante tinan 24 okupasaun Indonézia nian, timoroan 200,000 maka hetan oho hosi forsa invazora. Profesor, filozofu no ativista polítiku,Noam Chomsky, hatete katak invazaun no okupasaun Indonézia nian iha Timor-Leste nu’udar ezemplu jenosídiu ne’ebé aat liu desde Holokaustu.

Em Português: Xanana apela ao povo para “esquecer tudo” e receber generais indonésios com “coração grande”