PR Ramos Horta Konvida Eurico Guterres, Esforsu Taka Prosesu 1999

Timor Post - Beatriz Belo & Augosto Sarmento

DILI—Eis lider timoroan pro autonomia iha 1999, Eurico Guterres posibilidade hetan konvite hodi partisipa komemorasaun loron proklamasaun independénsia ba dala 49, iha 28 Novembru.

Prezidente Repúblika José Ramos Horta hatete ligadu ho situasaun pasadu ne’ebé involve husi Eurico Guterres, liu-liu ba krime grave sira ne’e, lalika prosesa, tanba la relasaun ho partisipa iha komemorasaun atu organiza tempu besik.

Aleinde ne’e, PR Horta mós atu konvida Prezidente Repúblika Indonesia (RI), PrabowoSubianto mai vista Timor-Leste, maibé seidauk iha konfirmasaun, tanba Prabowo hala’o hela viajen ba Rúsia, Xina no Amérika. Bainhira Prabowo fila, maka halo konfirmasaun ho estadu Timor-Leste kona-ba vizita ne’e.

“Ita Konvida Prabowo mai vizita Timor-Leste iha fulan Dezembru tinan 2024 ne’e, maibé depende Prezidente Repúblika Indonesia nian ajenda, nune’e PR Horta konvida mós jenerál sira seluk atu mai vizita Timor-Leste,” afirma PR Horta.

Esforsu taka prosesu

PR Horta konta, esforsu aan makas hodi taka prosesu iha violénsia entre Timor oan ne’ebé akontese iha 1999.

Horta konsidera timoroan sira iha Kupang ne’e kazu espesiál, tanba 1999.Iha semana liu ba Horta ba Kupang hodi pasa ferias ho nune’e husu hasoru malu ho timoroan sira iha Kupang no iha jantár hamutuk.

“Ha’u hatete de’it ba sira katak, ha’u kontinua esforsu para ita taka duni prosesu 1999 ne’e, la bele de’it hanoin sira 1999 ona, ne’ebé lakon ona responsabilidade,” dehan Jose Ramos Horta.

Nia haktuir, di’ak liu, taka de’it prosesu ne’e 100%, Primeiru Ministru (PM), Kay Rala Xanana Gusmão sempre koordena, maibé daudaun ne’e hein de’it momentu ida para halo prosesu kona ba rekonsiliasaun ne’e.