Opozisaun timoroan akuza Prezidente Parlamentu hala’o sesaun “ho hahalok la demokrátiku”

RTP NOTÍCIAS em Português - Tradução para Tetun de Timor Hau Nian Doben

Bankada Frente Revolusionariu Timor-Leste Independente (Fretilin) ​​nian ohin akuza Prezidente Parlamentu hodi hala’o debate Orsamentu Jeral Estadu nian “ho dalan la demokrátiku”, iha loron dahuluk, segunda-feira.

"Bankada Fretilin nian labele la halo denunsia katak, durante loron dahuluk debate nian iha espesialidade Orsamentu Jeral Estadu 2025 nian [OGE], sesaun ne’e hala’o ho forma la demokratika hosi Prezidente Parlamentu", Fernanda Lay, afirma, iha komunikadu , bankada lider opozisaun timoroan nian.

Fretilin hatene katak hahalok ida ne'e hanesan "deliberadu hodi trava partisipasaun ativu no relevante hosi opozisaun, inklui mos  desrespeitu no violasaun konstante hosi giaun no rejimentu Parlamentu nian".

Partidu ida ne’e esplika katak aprezenta ona proposta alterasaun ida atu nune'e dolar millaun 4,2 resin (besik euro millaun 3,8) ne'ebé destinadu ba sosa karreta foun sira ba Parlamentu sei dirije ba estabelesimentu sentru saúde rua, espesializadu iha kardiolojia no onkolojia.

Maibé, tanba erru tekniku ida hosi ekipa Parlamentu nian, proposta ne'e la rejista ho loloos iha sistema. Bainhira rekonese erru ida ne'e, ekipa teknika tenta hadi'a situasaun ida ne’e no hato'o proposta substituisaun ida. Maske nune’e, Prezidente Parlamentu nian,  rekuza hodi autoriza submisaun, nune’e nia  blokeia posibilidade hodi diskute realokasun ida ne’ebé maka prioridade liu no relevante ba saúde públika”, hatete Fretilin.

Iha protestu, "kontra jestaun la demokrátiku" no "violasaun hosi regra rejimental sira", tantu Fretilin no Partidu Libertasaun Populár (PLP) lakohi partisipa iha votasaun ba proposta sira ne'ebé maka iha hela diskusaun.

Iha komunikadu ida ne’e , partidu destaka katak nasaun hasoru hela "krize grave ida iha sistema saúde nian" no katak ema barak ho moras kardiaku no onkolojiku sira tenki  ba rai liur hodi simu servisu espesializadu sira.

Ministériu Saúde identifika tiha ona nesesidade hodi kria sentru sira ne’e,  kardiolojia no onkolojia nian. Maske nune'e, laiha fundu sira ne'ebé aloka iha OGE 2025 hodi hahu projetu sira ne'e, ne'ebé rezulta iha kontinuasaun falta asesu ba tratamentu krítiku sira ba sidadaun timoroan sira", salienta.

Fretilin husu ba Prezidénsia Parlamentu nian atu "respeita prinsípiu sira no fo’o prioridade ba populasaun nia moris diak " no  Parlamentu ho Governu "konsentra esforsu sira ba hadi'a kualidade moris sidadaun sira nian, fó onra ba sakrifísiu sira iha pasadu , liu hosi asaun konkretu sira ne’ebe fo’o  benefísiu ba povu iha  prezente no futuru".

Parlamentu timoroan hahú ona debate kona ba espesialidade hosi OGE ba tinan 2025 iha loron segunda ida ne'e, ne'ebé sei hala'o to'o loron 25.

OGE, ho folin dolar millaun rihun 2,617 (euro millaun rihun 2,430), la hetan  votu kontra, hetan aprovasaun iha jeneralidade iha loron sesta liuba, ho abstensaun partidu prinsipal opozisaun nian.