Líder opozisaun timoroan dehan OGE ba tinan 2025 hanesan “estagnasaun” ba dezenvolvimentu

Lusa - Tradusaun ba Tetun hosi Timor Hau Nian Doben

Sekretáriu Jeral Frente Revolusionária Timor-Leste Independente (Fretilin)nian, Mari Alkatiri, hatete katak Orsamentu Jeral Estadu ba tinan 2025 ne’ebé Governu aprezenta hanesan “dezastre”, "aestagnasaun" ida ba dezenvolvimentu  rasik.

“Kona ba defende soberania ne’e hanesan dezastre ida, kona ba  dezenvolvimentu ne’e hanesan amputasaun ida, iha termus polítika ekonomika ne’e hanesan amputasaun ida ba dezenvolvimentu rasik”, tenik eis-primeiru-ministru timoroan, iha konferensia imprensa iha sede partidu nian, iha Dili.

Iha loron kuarta ne'e, parlamentu nasional hahú debate no vota ba Orsamentu Jeral Estadu (OGE) ba tinan 2025, ho folin dolar biliaun 2,617 (euro biliaun 2,410) no dedika ba tema “Investimentu iha infraestrutura estratéjiku sira , hametin ekonomia no hadia sidadaun sira nia moris.

“Ida ne'e maka orsamentu ida ne'ebé sei hapara dezenvolvimentu kompletamente. Primeiru, abilidade atu ezekuta, mezmu iha nível kapital dezenvolvimentu de’it, la eziste, ne’e signifika katak obriga makina ida ne’ebé la funsiona ona,  atu servisu maka’as liu fali buat ne’ebé sira abitua tiha ona atu servisu”, tenik Mari Alkatiri.

Ba líder Fretilin nian, dolar millaun 400 (euro millaun 372) ba kapital dezenvolvimentu nian “la viavel”.

“Laiha kapasidade atu ezekuta, partikularmente bainhira kompromisu ne’e maka  ezekusaun ho kualidade no karik  ezekusaun ho kualidade ita tenke tau osan menus,” nia dehan.

Primeiru-ministru Timor-Leste nian, Xanana Gusmão, admiti iha loron kuarta ne'e katak ezekusaun OJE 2024 nian durante semestre dahuluk tinan ne'e hanesan "moderadu tebes" ho taxa 63%, prevee katak sei aumenta ba 86% to'o fulan Dezembru.

Ba Mari Alkatiri, iha mos amputasaun ida ba ekonomia, tanba investimentu estratejiku ba nasaun, ne’ebé tuir loloos hahú iha tinan 25 liuba, iha área sira hanesan edukasaun,  formasaun, saúde no diversifikasaun ekonómika, “la halo”.

Ikus mai, dirijente Fretilin konsidera katak OJE “iha objetivu foti osan públiku” no “enxe bolsu” elementu balun iha setor privadu nian.

“Iha prazu badak ka médiu, karik iha nesesidade atu deside kona ba parseria sira entre timoroan sira no potensial   investidor internasional ka rejionál sira”, elementu sira ne’e sei “ maka sei  sai parseiru sira. Ida ne'e hanesan dalan ida atu fa'an Timor-Leste nia soberania,” nia hatete.

Kestionadu  hosi Lusa kona  pozisaun voto  bankada Fretilin nia iha parlamentu, Mari Alkatiri hatete katak ida ne'e seidauk husu ba nia, maibé nia sei transmiti bainhira ema husu.

Debate jeral kona ba OGE 2025 sei dura to'o loron sesta. Diskusaun no votasaun ba espesialidade no votasaun final global sei hala'o entre loron 11 no 25.