DILI, 06 novembru 2024 (TATOLI)–Vigáriu Judisiál Tribunál Eklesiástiku Arkidioseze Metropolitana Dili, Graciano Santos Barros, husu Governu no Parlamentu Nasionál atu aloka Orsamentu Jerál Estadu (OJE) 2025 ba iha setor produtivu sira hanesan Agrikultura, edukasaun no saúde.
Setór produtivu sira-ne’e sei fó benefisiu ba iha populasaun, tanba área sira-ne’e konsideradu hanesan aliserse ba iha populasaun nia moris di’ak.
“Ba Parlamentu Nasionál, ba mós Governu atu haree ba nesesidade povu nian, liuliu tau matan ba iha área produtividade sira-ne’ebé ikus mai bele lori benefisiu ba ita-nia povu nomós nasaun. Iha área ne’ebé importante ba oin mak saúde presiza mellora tan, edukasaun nomós agrikultura,”
Vigáriu Jerál Arkidioseze Metropolitana Dili, Graciano Santos Barros, hateten ba Agência TATOLI, iha Sede Episkopál Lecidere.
Ba dezenvolvimentu área produtivu sira-ne’e, Nailulik ne’e hateten, Governu presiza mós dezenvolve infraestrutura bázika sira-ne’ebé fó sustentabilidade ba povu.
“Infraestrutura di’ak mak hanesan estrada no aeroportu no bu’at sira husi kiik to’o boot. Ida-ne’e hanesan ita harii uma ida karik iha fundamentu ka aliserse ba nasaun ninian. Ida-ne’e ita tenke hare didi’ak husi Orsamentu Jerál Estadu ne’e, lori benefísiu ba ita-nia povu no nasaun,” nia dehan.
Nia hateten, programa Governu nian tenke konkreta ba iha orsamentu Estadu nian hanesan iha konstrusaun sira.
“Parte igreja ninian laiha dúvida ba obra sira-ne’ebé fó benefisiu ba povu. Obra boot sira-ne’ebé fó benefisiu ba povu hanesan aeroportu,” nia dehan.
Jornalista : Jesuína Xavier Editór : Cancio Ximenes
Sem comentários:
Enviar um comentário
Nota: só um membro deste blogue pode publicar um comentário.