Vizita Sua Santidade Amo Papa Franscisco, PNTL Sei Blokeia Estrada Públiku Balun

Jornal Independente - By Ivónia Varela

Díli- Relasiona ho vizita Amo Papa Francisco mai Timor-Leste iha loron 09 toó loron 11 fulan Setembru tinan ne'e, maka Komandu Polísia Nasional Timor-Leste (PNTL) liuhosi Departamentu Tránzitu Seguransa Rodoviaria (DTSR) sei blokeia estrada públiku balun iha Kapitál Dili.

Xefe DTSRN, Superintendente Assistente Polísia Luis da Costa liuhosi konferensia imprensa hatete, pontu fokal neébe instala iha forsa tarefa informa mai Polísia Tránzitu katak dalan balun hirak ne'ebé maka ita sei blokeia permanente durante loron 07 toó loron 11 fulan Setembru no mós rute ne'ebé Santo Papa liu.

 “Tanba ne'e hakarak informa ba públiku liu-liu iha Kapital Dili katak hahuú loron 07 fulan Setembru dalan hirak neébe ita atu hamate neé maka iha area Nunciatura (Motael) ninian, husi Ministeriu Turizmu, Embaixada Thailandia, Jardim Motael, Cruzamentu Motael sorin, Portu Dili, Postu Colmera no mós iha Hotel Timor nia kotuk, dalan hirak neé iha loron 07 ita sei hamate total”, informa Superintendente Luis ba jornalista sira liuhosi konferensia imprensa iha Caicoli, (02/09).

Nia hatutan, sei blokeia dalan protokolu iha loron 09 fulan Setembru hahuú husi área Airportu toó Nunciatura hanesan husi Rotunda Nicolau Lobato, CFP, Ponte CPLP, Cruzamentu Timor Plaza, Eskuadra Dom Aleixo, Kuartél Jeneral F-FDTL, Kampu Alor, Postu Flamboyan (Uma Lafatik), tun fali mai Ministeriu Turizmu ninian.

"Nuneé husu ba komunidade sira dalan hirak neébe ohin mensiona dala ruma labele hetan asesu ba iha sirkulasaun estrada públiku," nia apela.

Fatin hirak ne'ebé blokeia mak PNTL deside loke sei diresaun ne'e sei kontra tanba sei direita ba Palasiu Prezidente ninian, dalan sira neé ita hamate wainhira ita nia Sua Santidade Amo Papa liu.

Xefe DTRSN kontinua informa katak iha loron 10 fulan Setembru, ita sei hamate dalan husi Nunciatura ba Irmã Alma iha Pantai Kelapa hahuú husi Ministeriu Turizmu, Kampu Alor, MNEC, Embaixada Amerika, Pertamina Pantai Kelapa, IOB dalan hirak neé sei hamate.

Husi fatin Irmã Alma atu ba fali Igreja Catedral, ita sei blokeia dalan sira hanesan Catedral, Cruzamentu EDTL, Edifisiu BNCTL Obrigadu Barak, Ministeriu Edukasaun no mós iha entrokamentu Tuana-laran nian tanba Amo Papa nia rute husi Irmã Alma ba Catedral.

Tanba neé dalan sira hanesan husi Timor Plaza nia kotuk no oin, Merkadu Comoro, Eskuadra Dom Aleixo, Kuartél Jeneral F-FDTL, Kampu Alor, Aitarak Laran, Rotunda Tugu Pramuka, mai los fali Colmera, saé ba edifisiu EDTL maka sa'e ba Catedral, dalan sira neé ita sei taka.

“No iha loron 10 fulan Setembru husi Nunciatura ba Tasi-tolu, dalan neébe ita blokeia neé maka dalan protokolu sira neébe ohin hau mensiona neé hahuú husi Rotunda Tugu Pramuka sae mai los toó Tasi-tolu neé ita hamate hotu, nuneé mós hafoin misa husi Tasi-tolu mai Nunciatura nafatin liu husi dalan protokolu sira ohin hau temi," nia subliña.

Nia salienta, Ikus liu iha loron 11 fulan Setembru, viagem husi Nunciatura ba iha CCD, entaun fatin sira neébe ita hamate/blokeia maka hanesan iha Championes, Caicoli RBC Rumbia, Cruzamentu Balide, Cruzamentu Kintal Boót, entrakamnetu eis edifisiu Suku Santa Cruz, Kintal Kiík no mós entrakamentu Gedung Kebudayaan Indonesia, fatin sira neé ita sei hamate hotu.

Dalan husi Nunciatura ba CCD maka liu husi Nunciatura, Portu Dili, Palasiu Governu, BCTL, Hidayat, Rotunda Merkadu Lama pois tama iha CCD.

No fila fali husi CCD ba Nunciatura husi Championes, Caicoli, Rotunda Ministeriu Justisa, Catedral, Edifisiu Colmera, Postu Tránzitu Kolmera, Portu Dili ba iha Nunciatura. No husi Nunciatura ba Airportu husi Nunciatura, Portu Dili, Postu Tránzitu Kolmera, ETO, Mandarin, Aitarak Laran, Kampu Alor, Kuartél Jeneral F-FDTL, Eskuadra Dom Aleixo, Merkadu Comoro, Timor Plaza, Ponte CPLP, CFP toó Rotunda Nicolau Lobato.