“Se loos maka hipócrita”? Ó mak hipócrita Rui Araújo!

Guilherme Gusmão

Hau le’e iha Facebook katak Rui Araujo husu ba Timor Oan sira sé maka sai ema hipocrita tanba Papa husik Timor no hahú kritika barak kona ba komportamentu aat no antisosiasl Xanana Gusmão nian iha aeroporto bainhira ba despede Amu Papa.

“Se loos maka hipócrita? Santo Padre foin liu minutu belun deit, atitude LA RESPEITA Katuas sira viral fali kedas!…”, Rui Araújo.

Ha’u iha novidade ida ba ó Araújo! Ó ema hipocrira, ó maka hanoin katak ami tenki nonok liu uainhira ita hare’e ita nia lider halo sala boot hasoru Timor Oan sira? Papa la dehan ba nonok hasoru injustisas hasoru povu no rai ida ne’e, Amu Papa dehan ba haree ita nia inan, aman no avo sira, Francisco la dehan ba defende ema koruptor, ema la respeita familia, ema imoral ne’ebe kaer labarik feto sira nia susu no rei sira nia ibun, lafaek sira ne’e maka ita tenki kuidadu tanba destroi ita nia kultura no ita nia identidade…ó nia identidade mos konfuzaun boot iha ó nia moris, los ka lae? 

Tanba sa labele sai viral komportamento imoral Xanana nian iha aeroporto? Ida ne’e naran maka karma, ida ne’e sinal Maromak nian hodi desmaskara Ramos-Horta no Xanana Gusmao ne’ebe iha Papa nia oin sira nia komportamento hanesan anju maibé iha kotuk sira trata Povu aat liu balada fuik.

Rui, ó iha ne’ebe uainhira sira halo despeju ba familia barak iha Tasi Tolu? Tanba sa ó la hamrik no bolu ita nia ukun nain sira hipócrita? Tanba sa ó nonok deit no uainhira povu kiik koalia kona ba ó nia kamarada lafaek sira ó hamrik kedas hodi defende sira. 

Keta lori Amu Papa nia naran ba insulta ema ne’ebe koalia lia loos. Amu Papa mos husu ba joven sira halo “ barulho” maibe halo barulho hasoru lafaek sira maka perigozu tebes, keta haluha saida maka iha ó nia governo akontese ho Mauk Moruk.

Ó hanesan mediku ida ó haree hospital sira nia kondisaun, aimoruk laiha, povu barak mate tanba ukun nain nia ukun sabraut no ita boot halo saida? Nonok deit, hipócrita, halo moe  Juramento de Hipócrates ne’ebe ita boot halo ba sai mediku. Ita boot hatene maka koko estraga partidu FRETILIN hodi hetan kadeira foun ida, maibe, la hetan, boy!

Lalika stress bainhira joventude kritika ita nia ukun nain sira, lalika tauk, tenke fo’o forsa ba sira tanba joven barak mate maka ita nia rai hetan independensia.

Ita boot la preokupa ho liafuan Papa nian? Ka ita boot mos sente aan ladiak tanba ita boot mos bele tama iha lafaek nia kategoria? Dr Rui Lafaek Araújo? Karik ita boot mos hamrik tanba hamutuk ho lafaek sira hodi hetan benefisiu ba ita nia aan rasik?

Husik povu hakilar kona ba injustisa ne’ebe povu enfrenta, tanba povu nia lian Maromak nia lian!