Razaun Papa Francisco prezide misa Tasi-Tolu ho lian Portugés

Tatoli - Abílio Elo Nini & Maria Auxiliado

DILI, 06 Setembru 2024 (TATOLI) – Koordenadór ba Sesaun Liturjia ba Preparasaun Misa iha Tasi-Tolu, Padre Justino Tenec, esplika razaun Santu Padre prezide misa solene ho língua portugeza.

Amu Justino Tanec esplika katak iha planu inisiál ne’ebé aprezenta ba Vatikanu katak timoroan sira hakarak atu Santu Padre selebra misa ho lian tetun, nune’e ema barak bele komprende, maibé iha 10 Maiu 2024, kuandu ekipa liturjia hasoru malu ho ekipa Vatikanu no aprezenta Konferénsia Episkopál Timorense nia proposta atu Santu Padre selebra misa ho lian-tetun, maibé sira (Vatikanu) hato’o kestaun balun.

Kestaun ida mak Santu Padre nia idade 87 ona no nia halo peregrinasaun naruk iha nia viajen ida-ne’e, entaun Vatikanu hatene mós katak Timor-Leste ne’e iha língua ofisiál rua, tetun no portugés, “tanba ne’e sira husu ita-nia kompreensaun no ita-nia lian [ofisiál] mós dehan portugés, [Vatikanu] prefere atu Santu Padre prezide eukaristia ho lian portugés, nune’e Santu Padre labele esforsa-aan demais atu apreende tetun, tanba idade no bele afeta mós ba nia saúde”, amu esplika iha enstrevista eskluziva ho Tatoli, iha estúdiu Farol, Dili.

Tuir artigu 13.0 iha Konstituiusan Timor-Leste nian ne’ebé ko’alia kona-ba Lian ofisiál no nasionál, iha alínea 1 hateten Repúblika Demokrátika Timor-Leste nia lian ofisiál maka Tetun no Portugés.

Notísia relevante: Família Lú Olo no Taur Matan Ruak sei lori ofertóriu iha misa Tasi-Tolu Saserdote ne’e salienta katak ho asuntu sira ne’e maka, iha loron 10 Maiu, Vatikanu prefere lian

portugés no sesaun liturjia hato’o fali ba Konferénsia Episkopál no komprende kondisaun ida-ne’e.

“Tanba lian portugés mós nu’udar lian ofisiál Timor-Leste nian, nune’e konferénsia episkopál aseita ho preferénsia Vatikanu nian atu Santu Padre prezide misa ho portugés”, nia reitera.

Atu sarani sira bele partisipa selebrasaun eukarístika ho di’ak mak Konferénsi Episkopál mós nomeia ona Padre Joaquin Sarmento husi kongregasaun Jesuita hodi halo tradusaun ba lian tetun hodi fasilita sarani sira bele komprende.

Aleinde ne’e, durante iha selebrasaun misa ida-ne’e, iha televizaun sei tau mós tradusaun. “Sesaun liturjia prevee ona iha omília, amu Papa sei pronúnsia iha lian español, Konferénsia Episkopál prepara no nomeia Padre Joaquin Sarmento mak sei tradús Santu Padre nia omília iha lian tetun ho intensaun atu mensajen Santu Padre nian bele to’o ba sarani sira hotu ho lian ne’ebé kompreensivu nu’udar lian ofisiál”, nia hateten.

Ami informa mós katak bainhira selebrasaun eukarístika remata, Papa Fransisco sei haleu filleira sira-ne’ebé prepara ona atu fó bensaun ba sarani sira, tanba misa solene ne’ebé Papa prezide hahu tuku 04:00 loraik to’o 06:00 no misa ho durasaun oras ida liu.

“To’o tuku 06 lokraik, Papa sei haleu kuaze minutu 45 ba sarani sira hodi saúda no fó bensaun ba sarani sira-ne’ebé partisipa misa iha Tasi-Tolu”, dehan.

Kona-ba preparasaun husi parte sesaun liturjia nian ba espasu ka fatin ba misa hanesan altar, meza, kadeira, ambaun 100% ona. “Ami-nia preparasaun ba liturjia bele dehan 100% ona. Ba preparasaun sira liga ho sasán sira-ne’ebé nesesáriu, falta balun ne’ebé sei halibur husi instituisaun sira, ne’ebé sei iha prosesu ba mobilizasaun”, esplika.

Tuir dadus, rejista provizoriamente sarani sira husi Dioseze Baucau, Dili no Maliana ne’ebé sei partisipa misa solene iha Tasi-Tolu hamutuk 164.777.