Prezidente Autoridade Munisipal Dili kondena violensia hasoru povu

Lusa - Tradução para Tétum de Timor Hau Nian Doben

Prezidente Autoridade Munisipál Dili, Gregório Saldanha, kondena violénsia ne'ebé hala'o kontra vendedór ambulante sira iha kapital Timor-Leste,  no hatutan katak povu sei sai "vítima" nafatin.

"Ha'u hanesan oan husi povu ida ne'e, hanesan parte integrante husi povu ida ne'e, hau la konkorda no ha'u kondena aktu  violénsia sira ne'e. Sira halo povu sai vitima ba beibeik. To'o ohin loron, ita sei halo povu sai vítima nafatin. Iha dalan seluk atu rezolve problema hirak ne'e," dehan  Gregório Saldanha. 

Video barak ne'ebé publika iha rede sosiál iha tersa-feira hatudu bankadas husi  vendedor ambulante sira ne'ebé destruido. Jornalista rua mos hetan impedimentu husi forsa seguranza, ho ida hetan detensaun. 

Sosiedade sivil Timor oan denunsia hela despeju sira ke "forsadu no ilegál" ne'ebé hala'o husi Governu, tanba la hatudu dalan seluk ba sira ne'ebé sai afetadu.

"Ita tenke kria kondisaun sira, ida ne'e kritériu báziku. Ha'u mai iha ne'e husi loron 01 Marsu no ita tenke kria kondisaun iha merkadu sira. Ha'u hatama iha orçamentu ba tinan 2025, proposta atu kria kondisaun iha merkadu sira, inklui espasu estasionamentu. Ita iha rai iha Hera atu konstrui uma ba ema sira bele muda," hateten Prezidente Autoridade Munisipál Dili.

Ba Gregório Saldanha, ne'ebé koalia ho jornalista sira iha sede Autoridade Munisipál Dili, ita tenke kria kondisaun atu tau  populasaun no tenke rezolve problema ne'e, maibé la bele ho violénsia.