Polisia Kaptura Arbitrariamente Ativista Direitus Umanus

Press Release from Human Rights Defenders Network

Iha loron Segunda Feira, 2 Setembru 2024, mais ou menus oras tuku 12:00 Polisia Nasional Timor-Leste ne’ebe  destakadu iha Airoportu  Internasional Nicolao Lobato  halo kapturasaun ba  Nelson  Roldão.  

Tuir kronolojia, kolega nain rua ho Naran Lorico no Nelson  akompaiña kolega husi Papua ida ne’ebe ba iha Airoportu Internasional Nicolao Lobato atu fila ba Indonesia. Kolega Papua ne’e mai Timor-Leste hodi tuir formasaun Diplomata nian ne’ebe oferese hosi Diplomacy Training Program (DTP).

Wainhira  to’o iha Airoportu no kolega Papua ne’e tama ona ba iha imigracao atu sae ba aviao Citilink, Nelson ho Lorico fila fali, maibe too iha portao atu selu tikete parkir nian, Polisia sira ho farda sivil ho sira ne’ebe servisu iha loket lakohi loke  odamatan atu Nelson sai, no bainhira Nelson sai, Polisia lubuk ho farda sivil duni nia no sena pistola hodi ameasa Nelson no kaptura nia. Polisia halo kapturasaun ba Nelson tanba nia tara pasta ho koor bandeira ne’ebe hanesan ho Bandeira Papua Oeste, materia ida ne’ebe la tama iha materia krime tuir Kodigu Penal Timor-Leste. 

Relasiona ho aktus ne’e, ami hosi Rede Defensor Direitus Humanus konsidera detensaun no ato Polisia nian hasoru Nelson nu’udar kapturasaun arbritraria, ilegal tanba la tuir prisipiu direitus umanus no konstituisaun RDTL hanesan estipula iha artigu 10, alinea 1, ne’ebe haktuir katak Republika Demokratika Timor Leste- mos solidariu ho povu hotu-hotu ne’ebe luta ba libertasaun nasional. Alinea 2. Republika DemokratikaTimor-Leste fo azilu politiku, tuir lei haruka, ba ema rai seluk sira ne’ebe presegidu tanba sira nia luta ba libertasaun Nasional no sosial, defesa ba direitus umanus, demokrasia no dame. 

Tanba ne’e urjentimente ami ejiji: 

Komandu Polisia Nasional Timor-Leste atu liberta imediatamente ativista direitus umansu Nelson Roldão [hafoin interogasaun, Nelson hetan liberdade iha tuku 18:00.]

Ejiji ba PDHJ hanesan Instituisaun uniku Direitus Umanus iha Timor-Leste ne’ebe iha knaar boot atu proteje sidadaun sira ne’ebe nia direitu violadu no opresivu iha rai laran.

Ejiji komunidade internaisonal atu foti asaun urjentemente ba Estadu Timor-Leste liu husi Instituisaun Seguransa (PNTL) ne’ebe halo ona kapturasaun ba ativista Direitus Umanus, Nelson  Roldão.

Husu ba komandu PNTL atu fo sansaun disiplinar ba pesoal sira ne’ebe  halo kapturasaun ilegal no viola direitu sidadaun nian no halo violasaun ba Konstituisaun RDTL.

Husu ba Estadu Timor-Leste atu garante PNTL hodi obedece ba Konstituisaun RDTL no evita atu servi UUD 45 no Konstituisaun rai seluk nian.

Husu ba PNTL atu tenke hatene defini sasan krime tuir Kodigo Penal RDTL nian ho materia sira ba solidariedade internasional tuir Konstituisaun RDTL.