Polísia Indonézia kaer suspeitu hitu ne'ebé halo planu hodi ataka Papa

Lusa em Português - Traudusaun ba Tetun hosi Timor Hau Nian Doben

Jacarta, 07 Setembru 2024 (Lusa) - Polísia Indonézia anunsia ona detensaun ba ema hitu ne'ebé suspeita halo planu  atu halo ataque ba papa durante vizita Papa Francisco iha nasaun ida nee, ne'ebé ramata ona iha sexta-feira.

Maioria suspeitu sira nia detensaun maka akontese entre loron 02 no 03  setembru iha sidade Bogor, besik  kilómetru 50 hosi Jacarta, no Bekasi, iha parte loromonu hosi area metropolitana kapital nian, tuir komunikadu ne'ebé unidade antiterrorismu Densus-88 publika ona iha sesta-feira kalan.

Suspeitu sira, ne'ebé identifika deit ho letra inisial, sira  planeia halo atentadu hasoru Papa, tuir materiál ne'ebé hetan durante buska iha uma hosi detidu ida nian. 

Durante operasaun, autoridade sira  kaptura arku balun, rastilhos, drone ida , no propaganda hosi Estadus Islámiku nia , tuir autoridade sira hatete.

Porta-voz  Densus-88, Aswin Siregar, dehan katak investigasaun sei  la'o hela no seidauk hatene se detidu hitu sira ne’e hatene malu ka la'ós membro hosi sélula terorista ida de'it.

Papa Francisco halo ona vizita hosi loron 03 to'o 06 Setembru iha Indonézia, nasaun ida iha mundu ne'ebé maioria ema maka musulmanu sira. 

Durante vizita, Francisco vizita meskita Istiqlal iha Jacarta, ne'ebé hamutuk ho Imán bo'ot Nasaruddin Umar, sira hato’o mensajen unidade no harmonia relijiozu.

Francisco  daudaunvizita hela  Papua Nova Guiné, ne'ebé mak segunda parajen hosi vizita boot ida iha rejiaun Ázia-Pasífiku, ne'ebé sei lori nia ba Timor-Leste no Singapura.

Foto, Facebook.