Movimentu ke defende Ximenes Belo husu atu bispu fila mai Timor-Leste

Lusa em Português - Tradusaun ba Tetun hosi Timor Hau Nian Doben

Movimentu Nasional Solidariedade ba bispu Ximenes Belo hatama petisaun ida atu solisita  intervensaun hosi autoridade timor oan sira ba Vaticano hodi husu ba  Nobel da Paz ne'ebe akuzadu ho  alegasaun abuzu  ba labarik sira atu nia fila fali ba nassau ida ne’e.

Iha 2022, Vaticano anuncia katak impoin  sansaun disiplinar balun  ba bispu timor oan Ximenes Belo, hafoin  alegasaun katak Nobel da Paz halo abuzu  seksual ba labarik menor idade sira iha tinan 1990 iha nia rai laran. 

Petisaun ne'e, ho data 26 Agostu ne’ebe Lusa hetan assesu ohin loron, mak hatama ba primeiru-ministru timor oan, Xanana Gusmão, no Prezidente, José Ramos-Horta, husi Senado dos Liurai no Organizasaun Komunidade Inteletuál Timor Oriental  (OCITO) ne’ebe lori naran movimentu ida ne'e.

Iha petisaun ida ne’e, movimentu ida ne'e  husu ba primeiru-ministru no Prezidente atu "transmite aspirasaun no pedidu sira" ba Papa Francisco, ne'ebé sei hala'o vizita entre segunda no kuarta-feira ba Timor-Leste.

"Povu timor oan, ho ansiedade boot, hakarak katak ami nia aman doben, bispu, fila lalais hodi hasoru malu ho nia povu ne'ebé nia hadomi, no hamutuk kontribui ba konstrusaun futuru di'ak liu ba Timor-Leste," bele lee iha petisaun.

Movimentu ne'e mós husu atu solisita ba Santa Sé atu fo’o fila fali “ privilejiu hotu-hotu”  ba bispu Ximenes Belo, "no mos rekonese nia esforsu boot atu proteje ema barak ne’ebe hetan perseguisaun durante okupasaun hosi  forsas invazoras Timor nian”.

"Ami solisita ba boa vontade Vaticano nian, ne'ebé bazeia ba dokumentu pontifício “Fraternidade Humana” , atu konsidera fali nia pozisaun kona ba bispu, no rekonese nia hanesan aman Nasaun nian, amu no bispu, ne'ebé timor oan oan barak  hatuur konfiansa iha tempu difisil, no maintain esperansa ne’ebe sei moris ho timor oan barak ”, salienta.

Movimentu ida ne'e husu ba Papa Francisco atu "komunika" ho bispu timor oan hodi, liu husi "dalan konstrutivu no viável," fo’o aliviu ba sofrimentu, angústia no solidaun" ne'ebé Ximenes Belo enfrenta tiha ona iha tempu naruk.

Kastigu sira ne'ebé Vaticano fo’o ba bispu Ximenes Belo inklui limite ba nia movimentu no ezersisiu ba nia  ministeriu, no mos proibisaun atu mantein kontaktu voluntáriu ho labarik sira ka ho Timor-Leste

Iha setembru 2022, jornal neerlandês De Groene Amsterdammer publika testemunhu husi alegada vitima abuzu seksual sira,bainhira sira menor idade, krime sira ne'e akontese durante tinan barak no bispu halo krimi sira ne’e bainhira sei  ezerse kargu  hanesan ex-administrador apostóliku Díli nian no Nobel da Paz.

Ximenes Belo anunsia  nia rezignasaun  husi kargu administrador apostóliku Díli nian iha novembru 2002, no nia alega problema súde no nesesidade periodu naruk atu rekopera.

Bispu timor oan ida ne'e hela tinan barak iha Portugal,  nomeadamente iha rezidénsia Salesiano sira iha Lisboa, maibé  hosikedas denúnsia husi jornal neerlandês, nia paradeiru la konhesidu publikamente.