PR Horta Oferta Karreta Moke-22778 ba Liurai Brunei Sultan Haji Hassanal Bolkiah

Timor Post -  Beatriz Belo & Hermenegildo Da Costa Tilman

DILI, (timorpost.com)—Prezidente Repúblika, José Ramos-Horta, horisehik (10/06) entrega ona nia karreta estimadu ho naran moke ba Liurai Brunei Darussalam, Sua Majestade Sultan Haji Hassanal Bolkiah Mu’izzaddin Waddaulah, hanesan símbolu fraternidade no amizade entre nasaun rua.

Tuir PR Horta katak, karreta moke ne’e horisehik haruka ona ba Brunei Darusalem.

“Horisehik too tiha ona iha Burney, aviaun transporte ida lori, horisehik dadeer no horikalan too tiha ona, iha Palacio real iha Burney, ida ne’e ha’u oferta lembransa ba Liurai. Ha’u nia karreta ne’ebé ha’u fó ne’e, tuan no antigu, maibé espesiál. No liurai Brunei Darussalam, Sua Majestade Sultan Haji Hassanal Bolkiah Mu’izzaddin Waddaulah, sente kontente no fó valor los ba karreta ne’e, tanba mai husi ha’u, nu’udar sinál amizade, “dehan Prezidente Repúblika Jose Ramos Horta ba jornalista sira iha Palásiu Prezidensiál Bairru-Pite, Tersa (11/06).

Tuir PR Horta katak, ida ne’e primeira vez iha mundu, Prezidente ida oferta karreta oan ida tuan, maibé úniku.

“Lirau Bruney sente kontente los ho emosionadu. Tanba ne’e, mak aviaun ida espesiál mai tula karreta ne’e lori ba Burney, no karreta ne’e sei tau iha Muzeum Burney”,  hakotu.