Tenke Ke Iha Kongresu Nasionál Estra-ordináriu

Timor Post

Militante partidu FRETILIN hamutuk na’in-2.500 hato’o karta petisaun ba Komité Sentrál FRETILIN (CCF) hodi husu konvoka Kongresu Nasionál Estraordináriu, tanba konsidera estrutura atuál liuliu Prezidente FRETILIN, Francisco Guterres ‘Lú Olo’ no Sekretáriu Jerál, Mari Alkatiri, la hatudu sira nia dezempeñu eleitorál ho di’ak no lori insusesu ba partidu, lideransa atuál sempre lori derrota ba partidu.

Militante sira lamenta tebes rezultadu eleisaun parlamentár 21 fulan Maiu 2023 ne’ebé hatudu katak, FRETILIN lakon ka derrota eleitorál ida aat iha istória pos restaurasaun independénsia, ne’ebé halo militante no kuadru barak fuan moras no lakon liu tan esperansa ba lideransa agora ne’e ninia kapasidade, atu lori partidu istóriku iha ne’e bá vitória eleisaun sira tuir mai.

Militante FRETILIN laran moras ho votu porsentu 57,37, kadeira 55 iha Asembleia Konstituinte ne’ebé FRETILIN hetan, iha eleisaun tinan 2001, tanba méritu Istóriku hosi prosesu libertasaun patria, maski númeru eleitór iha Timor- Leste aumenta porsentu 99,2 hosi tinan 2001 ba tinan 2023, ho lideransa Prezidente Lú Olo no Sekretáriu Jerál Mari Alkatiri, FRETILIN nia votu tu’un hela de’it iha tinan 20 nia laran, nunka rekupera bá fali.

Maibé tuir loloos, eleisaun remata ita rona ona rezultadu hatudu katak partidu FRETILIN nia votu tun ka lakon iha eleisaun, lideransa Partidu tenke tuur analiza ona, tanba sá mak votu tun dala-ruma ami nia lideransa mak ladún di’ak ka oinsá, sé lideransa mak ladi’ak di’ak liu kria fali kongresu nasionál estraordináriu ida hodi fó biban ba Jerasaun FRETILIN foun sira hodi lidera fali FRETILIN hodi sukat fali masa iha eleisaun tinan 2028 ne’e.

Tanba jerasaun foun sira ne’e iha hanoin misaun no vizaun polítika ne’e luan, atu hakarak halo mudansa mudansa polítika ruma karik sira bele halo, sé mak lideransa la-troka nafatin hela de’it mak iha eleisaun 2028 votu ne’e sei tun aat liu tan no militante FRETILIN nian sei afilla fali ba partidu seluk ou sira sei harii fali partidu foun hodi kompete fali ho FRETILIN.

Ho nune’e lideransa FRETILIN hanesan Prezidente Francisco Guterres Lú-Olo no Sekretáriu Jerál FRETILIN, Mari Alkatiri, konsidera sira nia petisaun ne’e hodi realiza took Kongresu Nasionál Estraordináriu hodi hili fali jerasaun foun sira hodi ba lidera fali Partidu FRETILIN, tanba sira konsidera katak FRETILIN ne’e povu hotu nian, ne’ebé sira mós hakarak ba lidera Partidu FRETILIN.