Prezidente da Repúblika Ramos-Horta, nia beik, bulak ka Sr. Inkonstitusional ke la hatene lee?

Maubere Tuba Rai Metin

Ita nia  Prezidente ema barak gaba nia no nia mos gaba nia aan rasik (MOE LA IHA)  katak nia ema kalibre internasional, matenek, konesidu iha mundu ke nia konese Konstituisaun barak iha mundu maibe hau deskonfia ke lee mos ita nia Prezidente la hatene, lee no interpreta ita nia Konstituisaun maka la hatene duni.

Ninia mandatu nakonu ho atus inkontitusionais, hahu ona bainhira nia promulga lei indulto nian hodi nia fo’o perdaun ba nia belun boot, nia hanoin katak nia boot liu poder judisial, nia halo violasaun  separasaun poderes nian.  Ba rai liur la husu ona autorizasaun Parlamento Nasional, ba dei’t hanesan nia boot liu lei, kuitadu Prezidente hanoin ita beik no nia matenek bele tebe sai Konstituisaun tur ninia hakarak! Moe la iha.

Ramos-Horta no Xanana sira fabrika lei indulto foun hodi benefisia Emilia Pires no Tribunal deklara inkonstitusional, sira rua moe boot ka lae? Sorte tribunal orgaun independente no la lambe botas hanesan Horta lambe Xanana nia sapatu loron-kalan, nia lakon nia integridade, moral no desensia tan deit poder! Moe ka lae? 

Prezidente promete povu katak nia mai hodi repoin orden konstitusional maibe nia viola tun sae ita nia Konstituisaun hodi benefisia nia aan rasik nomos benefisia nia belun sira, ida ne’e maka Prezidente “matenek liu ema hotu” hatene halo.Ehhhhhhh!  Prezidente keta haluha ke ohin loron ita hotu matenek karik balun matenek liu Ramos-Horta, imi ema mestisu sempre hanoin hanehan povu, maibe povu Maubere hader ona no imi nia traisaun ita haree ona.

Foin Ramos-Horta fo’o posse ba Kalohan atu sai embaixador iha Indonésia, Prezidente ida ne’ebe maka hili ema ida ke sai arguido iha prosesu ida atu reprezenta ita nia rai iha rai liur? Hau hatene ke Kalohan sei ema inosente tuir lei, prezunsaun inosensia sei aplika ba Kalohan maibe Timor Oan barak bele okupa kargu ida ne’e, Horta tenki hili ema ida ke  sai arguido iha prosessu judicial ida? So ema bulak no beik  duni maka halo ida ne’e.

Karik moras mental halo ona atakasaun ona ba Ramos-Horta nia kakutak tanba nia atus la normal ona, karik nia halo atuasaun hanesan Xanana nia asulear, tanba ida ne’e maka nia nomeia Kalohan hodi nune’e Governo bele metin nafatin ho PD. Horta no Xanana hamorok duni ba poder, sira mesak distribui poder ba sira nia belun no familia, haree deit embaixador balun  ke Ramos-Horta nomeia, ita tenki hamanasa duni tanba nomeasaun sira ne’e nakonu ho nepotismo no favoritismo…

Ho hahalok aat sira ne’e hau husu ba ita boot sira: 

Prezidente da Repúblika Ramos-Horta, nia beik, bulak ka Sr. Inkonstitusional ke la hatene lee? 

Hau komesa iha duvidas boot se ita nia Prezidente hatene lee tanba ninia violasaun Konstituisaun demais ona. Dehan nia ema kalibre internasional afinal desizaun balun ke nia hasai hatudu momos katak nia beik liu kuda, la hatene lei penal, lei konstitusional nomos la hatene prosessu penal. Ema hanesan nia maka kalibre internasional ka? Halo deit ita moe, halo deit ita moe.

Ramos-Horta tenke moe oituan ba no para ona ho ninia arrogansia no vaidade, no ba estuda oituan tan hodi sai hanesan ita nia eis Prezidente Lu-Olo, ema ida ke matenek, respeitador Konstituisaun no la foti desizaun arbiru no bulak  hanesan Xanana nia atan ida ne’e. Imi goza ho Lu-Olo maibe imi nia kalibre la to’o kalibre Lu-Olo nian. Horta besik Lu-Olo nia ema ignorante boot ida, Lu-Olo matenek liu nia, Horta beik hanesan kuda, hau husu perdaun ba kuda sira, Horta beik liu kuda, ida ne’e maka los.

Agora nia ba dala ida tan ba rai liur, halo saida hodi benefisia ita nia rai maka la hatene duni, Sr. Inkonstitusional gasta osan kofre Estado la halimar, depois nia ba Facebook hodi gaba ke nia fo’o tulun ba povu ho migalhas envenenadas ke nia fo’o. Moe laiha gasta povu nia osan arbiru deit depois ho povu nia osan fo’o fali esmola ba povu! Ramos-Horta hanesan diabo boot  ida, ehhhhhh, moe la iha!

Karik rekurso la favoravel ba Kalohan no tribunal haruka nia ba kadeia, saida maka ba akontese ho governu ida ne’e, monu tanba PD sei sai hosi koligasaun?

Ita hein!