Ohin, Xanana dezloka bá Naktuka

Tatoli - Abílio Elo Nini & Evaristo Soares Martins

OÉ-CUSSE, 01 fevereiru 2024 (TATOLI) – Ohin, Primeiru Ministru (PM), Kay Rala Xanana Gusmão dezloka bá fronteira Naktuka-Citrana iha suku Bene-Ufe, Sub-Rejiaun, Nítibe Rejiaun Administrativa Espesiál Oé-Cusse Ambeno (RAEOA).

Observasaun jornalista Agência Tatoli iha terrenu, daudaun ne’e Xefe Governu, prepara ona iha Oé-Cusse atu viajen ba Naktuka iha oras tuku 08:00 dadeersan ne’e, akompaña direita hosi ekipa Delimitasaun Fronteira Marítima no Terrestre, Roberto Soares, no hetan akompaña mós hosi membru Governu balun hamutuk ho Sekretária Estadu Komunikasaun Sosiál, Expedito Dias Ximenes.

“Komunidade sira, hamutuk ho lia-na’in kulturál suku Bene-Ufe, ami hein ita-nia Primeiru Ministru atu mai esplika kona-bá polémika fronteira Naktuka, ida-ne’e importante atu ita-nia komunidade sira komprende,” Xefe suku Bene-Ufe, Marcos Meni, ba Agência Tatoli, hafoin partisipa iha serimónia pose ba autoridade foun iha otél ambeno, kinta ne’e.

Entretantu, iha loron 26 janieru 2024 ne’e, Primeiru Ministru hala’o enkontru bilaterál ho Prezidente Repúblika Indonézia, Jokowi iha Istana Bogor, Jarkarta hodi ko’alia kona-bá finalizasaun fronteira terrestre.

Liu-liu iha segimentu rua hanesan, Noelbesi-Citrana iha sub-rejiaun Nítibe hanesan fronteira ho Kupang NTT no Oé-Cusse Ambeno.

Nune’e mós Bijael Sunan-Oben iha sub-rejiaun Pássabe hanesan fronteira ho TTU parte NTT nian no Oé-Cusse Ambeno ho medida aktare 142,7.

Purtantu, Primeiru Ministru Kay Rala Xanana Gusmão, sei ko’alia ho Governu Lokál NTT atu haree ba kestaun fronteira no haree ba povu NTT no Oé-Cusse nia moris di’ak.

Tanba, nia dehan, iha enkontru bilaterál ho Prezidente Repúblika (PR) Indonézia Jokowi foin lalais ne’e, ko’alia mós kona-bá povu NTT no Oé-Cusse, tanba enkontru bilaterál ne’e ho intensaun atu dezenvolve Oé-Cusse.

Maibé iha enkontru ofisiál ne’e seidauk bele asina akordu formál ruma ba fronteira terrestre tanba seidauk iha konsensu.