Defeza António Kalohan Hatama Ona Rekursu ba TR Kontra Desizaun TJPID

Beatriz Belo & Liduway Xavier

DILI, (timorpost.com)— Ekipa Defensoria ne’ebé fó asisténsia legál ba arguidu eis Ministru Komersiu Industria no Ambiente (MKIA), António da Conceição ‘Kalohan’ ba kazu krime partisipasaun ekonomia negósiu, maka advogadu privadu, Pedro Camões, hatama ona rekursu ba Tribunál Rekursu (TR) kontra desizaun Tribunál Judisiál Primeira Instánsia Díli (TJPID) ne’ebé aplika pena prizaun efetivu tinan lima (5) ba nia kliente.

Defeza ba arguidu António da Conceição ‘Kalohan’, advogadu privadu, Pedro Camões, hatete ekipa advogadu ba arguidu António da Conceição ‘Kalohan’, iha loron Kinta, (01/02/24) iha tuku 04:00 lorokraik hatama ona rekursu ba TR, tanba konsidera desizaun Tribunál Judisiál Primeira Instánsia Díli ne’e laloos.

“Ekipa advogadu hafoin simu desizaun husi Tribunál haree ka análiza despaixu Tribunál Judisiál Priméira Instánsia Díli nia ne’e, la tetu no haree didi’ak no mós haree ho momoos entre despaixu simples ho ordem de servisu, razaun ida-ne’e mak halo rekursu hatama ona ba Tribunál Rekursu foin lalais ne’e”, dehan advogadu privadu, Pedro Camões, ba jornalista sira iha nia edifísiu Timor Plaza, Domingu, (04/01).

Nia hatete, objetivu hatama rekursu ne’e ba TR hodi nune’e TR haree loloos entre despaixu ho ordem de servisu, tanba António da Conceição ‘Kalohan’ ho Ministru Komérsiu Indústria la hanesan.

“Ami ekipa advogadu sira haree katak, desizaun husi Tribunál Judisiál Primeira Instánsia Díli ne’e todan, maibé halo presepsaun ne’ebé ladún loloos ba arguidu António da Conceição ‘ Kalohan”, nia akresenta.

Advogadu ne’e esplika, iha loron 16 fulan-Janéiru tinan 2024, defeza ba arguidu António da Conceição ‘ Kalohan’ simu despasu desizaun husi Tribunál liga ho desizaun ba kazu krime partisipasaun ekonomia negósiu hasoru arguidu. Tanba ne’e, ekipa Advogadu sira ho arguidu mós hakarak halo pedidu ida, auto konfiansa ba dokumentu hotu ne’ebé hanesan provas dokumentu iha tribunál nian, para aleinde konsulta autos ne’e, arguidu mós indika tan advogadu seluk hamutuk ho sira hodi prepara rekuru tanba ne’e finaliza ona rekursu.

“Hanesan bain-bain antes atu submete rekursu ba Tribunál Rekursu ami sei tuur hamutuk ho António da Conceição ho advogadu sira doutór Arlindo, ho doutór José Guterres, inklui ha’u hodi halo analiza hamutuk kona-ba faktu sira ne’ebé mak Tribunál Judisial Primera Instansia Dili hatete provadu, dokumentu sira ne’ebé ligadu ho akuzasaun, ikus mai finalmente Tribunál deside,” nia afirma.

Tuir nia, leitura ne’ebé advogadu sira halo rekursu ne’e dehan desizaun Tribunál Judisiál Primeira Instánsia Díli ne’e, bele dehan halo provadus no mós fó provas ne’ebé ladún loos. Defeza ne’e fó ejemplu, iha kazu konkreitu entre despaixu António da Conceição nian, agora hanesan rekorente ne’e, nia halo despaixu ida iha dia 15 de Jullu, liu loron 10 nia la Ministru Komersiu Industria. No Iha despaixu ne’e, rekorente António da Conceição haruka dirije ba diretór sira iha Ministériu Komérsiu Indústria sira atu halo levantamentu téknika sobre posilibilidade ou la posibilidade atu halo atividade iha Atabae.

Nia hatutan tan, hotu iha ne’e, António da Conceição ‘Kalohan’ ou rekorente la halo ona atividade iha Ministériu Komérsiu Industria maibé Ministru foun Komérsiu Indústria mak fó orden atu halo ordem por eskrita.

“Ami ekipa advogadu sira haree katak entre despaixu ho ordem eskrita Ministru foun Komérsiu Indústria mak haruka halo servisu, hodi hatudu empreza para halo atividade, mais despaxu ida priméiru ne’e diretór sira atu halo levantamentu téknika, entaun iha atividade ne’e la hanesan no tribunál konfundi katak António da Conceição ‘Kalohan’ fó orden atu halo projetu ba kompaña ida, maibé realidade fó ordem ba diretór tékniku ida para atu halo levantamentu tékniku,” nia subliña.

Tanba ne’e, tuir nia, signifika sinór António da Conceição ‘Kalohan’ la involve iha kazu ida-ne’e, tanba depois nia halo tiha despaixu ne’e, António da Conceição’ Kalohan’ muda tiha la Ministru ona ba iha Komérsiu Indústria, no la fó tan andamentu no ordem ba diretór sira no inklui servisu administrasaun komérsiu indústria, mais ministru foun mai mak fó ordem eskrita atu imprensa ida-ne’e, bele halo ou lae.

Eleinde ne’e, tribunál mós aplika pená partisipasaun ekonomia negósiu ba António da Conceição ‘Kalohan’, ho pena prizaun tinan-5 ne’e laloos, tanba António da Conceição ‘ Kalohan’ la haruka funsionariu sira atu kontratu ho empresa ka halo atividade masin nian, liga ho prosesu pagamentu.

“Ami advogadu sira mós haree katak Tribunál Judisiál Priméira Instánsia Díli hala’o julgamentu mais la haree provas ho data ne’ebé loloos no fó desizaun ne’ebé laloos”, katak nia.

Tanba ne’e, iha razaun duni atu husu Tribunál Rekursu análiza faktu sira ho krítiku ne’ebé advogadu sira halo, atu nunee ikus mai husu para absolvesaun ka liberdade ba António da Conceição ‘Kalohan’.