Posibilidade PR Horta 'Sei Piska-Malu' ho Kalohan

Independente- Agostinho Gama

DILI: Faktu hatudu ona. Kondenadu ne'ebé seidauk kumpre pena mós hetan ona indultu, tanba ne'e iha posibilidade Prezidente Republika (PR), José Ramos Horta, 'sei piska-malu' ho eis-deputadu Antonio da Conceição 'Kalohan' hodi hetan indultu.

La'ós segredu katak Sekretariu Jeral Partidu Demokratiku (PD), Antonio Kalohan mós fó apoiu másimu ba kandidatura PR Horta nian iha segundu ronde eleisaun prezidensial, foin lalais ne'e.

Ne'e duni, la taka dala ba PR Horta atu bele fó indultu ba Antonio Kalohan, nu'udar politika selu tusan.

Prezidente bankada Fretilin, Deputadu Aniceto Longuinhos Guteres hateten, Lei Indulto ne'e Prezidente Republika promulga fo kedas indulto ba Eis Ministra Finansas, Emilia Pires no Eis-Vise Ministra Saude, Madalena Hanjam, ne'ebe autor sira la kumpre tan pena prizaun.

"Lei ne'e halo para atu liberta ema sira ne'ebe nia gosta. Ema sira nia maluk nia amigu ka amiga. Ha'u hatene eis deputadu Antonio Kalohan mos sira maluk ne'ebe nia servisu makaas ba ba Ramos Horta atu manan iha eleisaun, agora sai Prezidente Republika. Parese nia atu selu fali Antonio nia tusan," dehan Aniceto, iha PN, horisehik.

Molok ne'e,  Prezidente Repúblika, José Ramos Horta informa, kazu atuál Embaixadór Timor-Leste ba Indonézia, António Conceição, ne'ebé Tribunál hamonu sentesa ho pena efetivu tinan lima prizaun, prosesu ne'e seidauk remata.

Nia dehan, kazu ne'e sei iha hela prosesu rekursu, tanba prosesu nee sei lao hela iha Tribunál Rekursu, bainhira desizaun Tribunál iha remata, mak desizaun ikus Prezidente sei haree liuhusi Konstituisaun RDTL inklui lei komutasaun pena foun neebé fó biban ba Xefe Estadu atu haree ba kazu sira nee.