ME Taka Odamatan ba Manifestante Profesór Kontratadu

Timor Post - Beatriz Belo & Liduway Xavier

DILI, (timorpost.com) — Ministériu Edukasaun (ME) taka odamatan ba manifestante profesór kontratadu ne’ebé kontinua halo demonstrasaun hasoru Ministra Edukasaun liga ho kontratu ne’ebé termina iha loron 31 fulan-Dezembru 2023 liuba. Ministériu Edukasaun taka odamatan edifísiu ME, Vila-Verde, Dili, tanba ne’e manifestante sira labele tama iha areadór ME.

Profesór kontratadu iha tinan 2023 kontinua ejiji ba Ministra Edukasaun atu kontinua sira-nia kontratu hodi servisu nu’udar profesór, tanba profesór sira hanorin ona ho tempu naruk maibé tanba saida mak la extende kontratu ne’ebé iha.

Tuir observasaun Timor Post iha loron 16 fulan- Janéiru tinan ne’e nota katak profesór kontratadu sira kontinua marka prezensa iha edifísiu Ministériu Edukasaun maibé portaun ministériu nian taka tanba konsidera prezensa manifestante sira-nian iha areadór ME nia defikulta servisu iha ME.

Nune’e mós tuir informasaun husi seguransa iha ME katak, sira taka portau tanba hetan orientasahn husi irárkia, tanba ne’e nu’udar seguransa ezekuta orden ne’ebé fó sai ona.

Banhira profesór kontratadu sira tama areadór ME difikulta servisu funsionáriu sira nia, tanba ne’e sira tenke taka portaun, atu nune’e la difikulta servisu funsionáriu sira-nia iha ME.

Entretantu iha manifestasaun ne’e kontinu hetan seguransa másimu husi Polísia Nasionál Timor- Leste (PNTL, iha areadór ME nian.(*)