DILI, (timorpost.com)— Xefe Departamentu Investigasaun Kriminál Nasionál, Superintendente Polísia, João Belo dos Reis, informa ohin (24/01) Governu Malázia deporta timoroan na’in-4 ne’ebé deskonfia sai vítima ba tráfiku umanu no servisu ilegál iha nasaun refere.
“Ita-nia sidadaun na’in-4 husi diferente munisípiu ne’ebé kategoria vítima ba tráfiku umanu, husi sidadaun estranjéiru ne’ebé halo rekrutamentu online ba sira, lori sira ba Malázia ikus mai sira sente labele ona mak sira aprezenta-an ba embaixada fila mai Timor”, Xefe Departementu Investigasaun Kriminál Nasisonál, Superintendente Polísia, João Belo dos Reis, informa ba jornalista ih Kuartel Jerál Polísia Nasionál Timor-Leste (PNTL) Kaikoli, Kuarta, (24/01).
Nia hatutan, “Ita iha ona dadus kuaze 60 pesoas mak ita deteta no sira ne’e fila ona mai Timor, sei iha tan lubuk ida iha ne’eba, ita buka nafatin para bele lori fila, tanba sira kuaze vítima tráfiku umanu husi ajénsia inresponsabilidade sira”.
Ajénsia sira ne’ebé halo rekrutamentu online ilegál, tuir Komandante ne’e katak, prosesu la’o hela, konsege detein ona ema na’in-2, no lori ona ba Ministériu Públiku no na’in-2 seluk polísia kontinua buka hela. Sidadaun Timor ne’ebé servisu ilegál iha Malázia ne’e kuaze viola buat hotu, vístu traballu laiha, pasaporte Timor nian, laiha koñesimentu autoridade Malázia nian, ne’ebé sira hela ho ilegalmente kuaze tinan rua iha Malázia.
“Sira servisu mais kalan husi fatin ida ba fatin ida, i sira nia osan ne’ebé sira simu fahe rua ho ajénsia tráfikante sira ne’e”, tenik Komandante ne’e..
Sidadaun sira ne’e ba Malázia diferente tinan, balun ba iha 2020, balun ba iha 2021 no balun ba iha tinan 2022, no sira na’in-4 ne’ebé deporta fila mai iha Kuarta 24/01 ne’e vítima sira ne’ebé ba iha tinan 2022.
Tanba ne’e, PNTL sei husu informasaun ba vítima sira ne’e para bele informa ema hirak ne’ebé fasilita, ba oinsá, ba halo nusa, depois polísia sei buka tuir.(*)
Sem comentários:
Enviar um comentário
Nota: só um membro deste blogue pode publicar um comentário.