Komunidade Naktuka Hahú Sofre Eviksaun, Husu PM Xanana Suspende Asina Tratadu

Timor Post -  Beatriz Belo & Liduway Xavier

DILI, (timorpost.com)– Estudante Universidade Nasionál Timor Lorosa’e (UNTL) husu Primeiru Ministru (MP), Kay Rala Xanana Gusmão, atu suspende imediatamente selebrasaun tratadu ba zona disputa fronteira Naktuka nian entre Estadu Timor-Leste no Indonézia iha loron 26 fulan-Janéiru tinan 2024. Tanba komunidade daudauk ne’e sei sofre eviksaun no ameasa psikolójiku husi negosiasaun ba delimitasaun fronteira iha Naktuka.

Portavós komunidade rai Naktuka, Nicodemos da Crus, hatete zona disputa Naktuka nian rezidente sira administrativamente tama suku Bene- Ufe, sub-rejiaun Nítibe, RAEOA, tuir tratadu entre Portugál no Holanda iha tinan 1904 ne’ebé kompleta iha Tribunál Internasional Arbritazen iha Fransa tinan 1914, hatuur estaka fronteira rai rua nian iha Noemna’a.

Iha periodu invazaun Indonézia, rejime Suharto mantein fronteira ne’e nu’udar fronteira entre provinsia Nusa Tengara Timur (NTT) no Timor Timur. Infelizmente negosiasaun foun ne’ebé halo ikus tinan 2023 ne’ebé taka ba públiku no la demokrátiku ne’e, hatuur fali estaka 76 iha Tepa Naek inklui Fatuk Sinai sei pertense ba soberania Estadu Indonézia nian.

“Ami husu solidariedade urjente ba entidade hotu atu fó apoiu materiál no imateriál ba komunidade rezidente Naktuka ne’ebé oras ne’e sofre eviksaun no ameasa psikolójiku husi rezultadu negosiasaun ne’e”, dehan Portavós, Nicodemos da Crus, ba Jornalista sira iha UNTL, Kaikoli, Kinta, (25/01).

Nia hatutan, “Rezultadu negosisaun ne’e kontra evidénsia ka faktu história sira no la bazeia ba Prinsípiu win-win solation, iha ne’ebé fó liu vantajen ba Estadu Indonézia, bainhira tratadu ne’e selebra duni husi Estadu RDTL no Indonézia maka ita sei lakon rai 270 hektar no Fatuk Sinai ne’ebé nakonu ho rekursu naturál hirak mak potensiál ba turizmu no agrikultura hodi estimula kresimentu ekonómiku ZEESM”.

Akordu ne’e mós sei lori mudansa sosiu-kulturál no ekonómiku iha REAOA partikulár ba uma- kain 74 nu’udar rezidente Naktuka nian. Rezidente hirak ne’e durante tinan 22 marzinalizadu no eskluidu husi dezenvolvimentu, ho nune’e populasaun iha Naktuka atu asesu ba asisténsia públiku sira ho dezafiu la’o-ain kilometru 5. Tanba ne’e, akordu ne’e sei afeta eis propriadade rai komunidade nian ba produsaun hodi aumenta liután sofrimentu komunidade.

“Hirak ne’e hotu mak ami lamenta ho rezultadu negosiasaun ne’e, hodi ezije no husu ba Eselénsia Primeiru Ministru, Xanana Gusmão, suspende imediatamente selebrasaun tratadu ba zona disputa Naktuka entre Estadu RDTL no Indonézia iha aban 26 Janéiru 2024,” dehan nian.

Nune’e mós husu ba Gabinete Delimitasaun Fronteira Terestre no Marítima atu klarifika tratadu foun ne’e ba públiku, atu nune’e aplika diplomasia mutuál ida ne’ebé iha relasaun resiprokal no labele sakrifíka fali soberania RDTL.

“Ami mós hakarak husu ba Eselénsia Primeiru Ministru Xanana Gusmão, demokratiza prosesu negosiasaun ba delimita fronteira entre Estadu RDTL no Indonézia, tuir prinsípiu ‘Nahe Biti Boot’ ne’ebé inkluzivu,” katak nian.

Portavós mós husu Parlamentu Nasionál atu halo fiskalizasaun imediata kona-ba lala’ok negosiasaun fronteira terestre iha zona disputa Naktuka.(*)