Governu retira kandidatu komisáriu CAC

Tatoli - Nelson de Sousa &  Rafael Ximenes de A. Belo

DILI, 25 janeiru 2024 (TATOLI)-Vise Ministru ba asuntu Parlamentár, Adérito Hugo da Costa, hateten Governu retira kandidatu komisáriu Komisaun Anti-Korrupsaun (CAC, siglá portugés) na’in rua ne’ebé antes ne’e iha tinan kotuk submete mai Parlamentu Nasionál (PN).

“Ha’u atualiza ba konferénsia líder bankada katak, depois Governu konsidera retira submisaun ida primeiru iha tinan kotuk nian, no kontinua halo apresiasaun diskusaun iha Konsellu Ministru para fó ona andamentu segundu korrespondénsia. Agora segundu korespondénsia ne’e mai ho saida, hau seidauk pronúnsia buat ida, tenke hein deliberasaun husi Konsellu Ministru,’’Vise Ministru ne’e hateten ba jornalista sira hafoin partisipa reuniaun lidér bankada parlamentár iha sala konferénsia PN, kinta ne’e.

Nia hateten, razaun retira tanba iha tinan kotuk submete kandidatu na’in rua mai, PN liliu bankada sira halo kontaktu la konsege iha konsensu atu prienxe rekezitu ida Deputadu prezente na’in-49 iha sala plenária atu hala’o eleisaun ba komisáriu CAC ne’e rasik.

Nune’e iha fulan janeiru tinan 2024 Governu kondisera korrespondénsia dahuluk ne’e la hetan andamentu husi PN atu halo eleisaun, nune’e konsidera korrespondénsia primeiru hotu ona.

“Entaun ami sei halo fali segundu korespondénsia, mas substánsia ne’e saida, ha’u seidauk bele pronúnsia, nune’e ohin aprezenta ba konferénsia líder bankada no Prezidente Parlamentu, katak depois korrespondénsia ida primeiru la konsege iha andamentu ami konsidera fali segundu korrespondénsia, maibé segundu korepondénsia mai ho saida seida’uk bele pronúnsia,’’ nia hateten.

Antes ne’e iha 13 setembru 2023 Governu liuhusi reuniaun Konsellu Ministru (KM), aprova projetu proposta rezolusaun, ne’ebé aprezenta husi Primeiru Ministru (PM), Kay Rala Xanana Gusmão, kona-ba naran sira hanesan Sérgio de Jesus Fernandes da Costa Hornai no Rui Pereira dos Santos, ne’ebé propoin ba Parlamentu Nasionál ba kargu Komsiáriu CAC.

Tuir lejislasaun ne’ebé vigora, naran sira ne’ebé propoin husi Governu sei analiza no vota husi PN, no sira-nia dezignasaun sei presiza maiória absoluta husi Deputadu ne’ebé marka prezensa, pelumenus 3⁄4 husi Deputadu ho funsaun efetiva.