Deskonfia Iha Indísiu Krime, KAK Halo Averiguasaun Direita Ba MS- Salimagu

Timor Post -  Beatriz Belo & Liduway Xavier

DILI, (timorpost.com) — Diretór Jerál Investigasaun Komisaun Anti Korupsaun, José Verdiál de Araujo, halo hela averiguasaun ba Ministériu Saúde (MS) liga ho prosesu ajudikasaun diréita ba empreza Salimagu Unip. Lda, ba fornesimentu ai-moruk.

Liga ho informasaun sira ne’ebé publika iha média sosiál deskonfia iha indísiu krime iha prosesu fornesimentu ai-moruk tanba tuir informasaun empreza Salimagu hatama ai-moruk direita no balun dehan indireita mai Timor-Leste.

“Ami investigadór sira halo inisiativa hodi halo prosesu ida-ne’e la signifika katak ami simu keixa ruma, maibé ami haree ba iha informasaun sira husi públika iha média sosiál ne’e, katak ajudikasaun direita ba iha kompañia Salimagu hodi fornese ai-moruk ne’e. Tanba ne’e, ita halo hela averiguasaun ba prosesu ne’ebé mak iha Ministériu Saúde nian kona-ba ajudikasaun direita ba iha kompañia Salimagu ne’ebé fornese ai-moruk ne’e”, dehan Diretór Jerál Investigasaun KAK, José Verdial de Araújo, ba Jornalista sira iha nia kna’ar fatin, Faról, Kuarta, (17/01).

Daudauk ne’e KAK sei iha hela faze averiguasaun hodi rekolla informasaun no dadus, inklui dokumentu relasaun ho prosesu ajudikasaun direita liga ho hatama ai-moruk.

Liuhosi prosesu averigugasaun mak foin haree katak iha indísiu korupasaun ka laiha indisiu korupsaun, hafoin ida-ne’e bele hatene, tanba prosesu averiguasaun ne’e foin hahú iha fulan ida- ne’e nia-laran.

“Ita hein de’it rezultadu averiguasaun ne’e oinsá, see iha indísiu krime ita sei kontinua halo auto partisipasaun ba iha Ministériu Públiku hodi halo investigasaun ba kazu ida nee,” nia dehan.

Antes ne’e, tuir informasaun katak Ministra Saúde rasik urjentimente halo azudikasaun direita ba kompañia Salimagu hodi sosa ai-moruk maibé to’o oras ne’e ai-moruk seidauk tama no hospitál HNGV, hospitál referál no sentru saúde sira menus ai- moruk hodi fornese ba pasiente timoroan ne’ebé halo tratamentu ba saúde.(*)