Amo Júlio Crispin "Prezidente Repúblika Bele Fó Tan Indultu ba Kalohan Agora"

Timor Post - Beatriz Belo & Liduway Xavier

DILI, (timorpost.com)— Desizaun husi Tribunál Judisiál Priméira Instansia Dili (TJPID) ba arguidu atuál embaxadór ba Indonézia, António da Conceição ‘Kalohan’ ne’ebé aplika pena prizaun tinan 5 efetivu ne’e seidauk finál tanba advogadu arguidu nian bele halo rekursu ba Tribunál Rekursu (TR) ba iha segunda instánsia.

Husi desizaun ne’e, jurista timoroan, Pe. Júlio Crispin, fó hanoin katak tuir lei indultu ne’ebé daudauk ne’e iha, Prezidente Repúblika (PR), José Ramos Horta, bele fó tan indultu bainhira arguidu nia advogadu hato’o pedidu indultu ba Xefe Estadu.

Maske nune’e, bainhira Tribunál Rekursu hakotu ona mak hakarak ka lakohi nu’udar arguidu, Kalohan tenke kumpri pena ne’ebé iha.

“Desizaun ne’e seidauk finál, tanba sei halo rekursu, banhira desizaun finál ne’e rekursu tiha lai mak desizaun finál mak foin bele prosesa ema seluk bele troka, para nia bele kumpri prizaun. See desizaun ne’e finál ona sinór António da Conceição ‘Kalohan’ tenke kumpre prizaun maibe agora daudaun lei indultu ne’ebé iha ne’e Prezidente Repúblika bele fó indultu aban ka bain-rua bele fó indultu kuandu sinór António da Conceição ‘Kalohan’ nia advogadu husu indultu ba Prezidente Repúblika,” Jurista timoroan, Pe. Júlio Crispin ba Timor Post via telefone, Kuarta (10/01).

Aliende ne’e, parte seluk mak kona-ba nomeiasaun argidu ba poder polítiku nu’udar embaixadór ba Indonézia.

“Kestaun ida seluk mak ita bele dehan aktu polítiku no aktu diplomátiku. Agora, ida desizaun tribunál nia ne’e aktu judisiál, ne’ebé ida-idak ho ninia servisu,” nia esplika.

Nia hatutan “Problema ba ita governante sira maka, sira hatene hela sinór António da Conceição ‘Kalohan’ ne’e nia kazu hela iha tribunál, maibé tanba-sá sira fó pose tan nia hodi asumi kargu embaixadór”.

Tribunál Judisiál Priméira Instánsia Dili (TJPID) aplika pena prizaun tinan lima (5) efetivu ba arguidu Antonio da Conceição ‘Kalohan’ no tinan haat (4) efetivu ba arguidu Apolinário do Santos Asunsão, tanba arguidu na’in rua provadu katak komete krime partisipasaun ekonómiku iha negósiu ne’ebé previstu iha artigu 299 kódigu penál Timor-Leste nian, bainhira arguidu Kalohan asumi hela kna’ar nu’udar Ministru Komériu Industria.

Antes ne’e Prezidente Repúblika, José Ramos Horta, fó ona indultu ba eis Ministra Finansas (MF), Emilia Pires, no Vise Ministra Saúde (V-MS), Madalena Hanjam, ba kazu ne’ebé hanesan.(*)