Prosesa Ema “Trata Lider” ba Ministeriu Publiku

Timor Post - Orlando Oqui 

DILI (timorpost.com) — Departamentu Investigasaun Kriminál (DIK), Polisia Nasionál Timor-Leste (PNTL), halo prosesu konfirmasaun ba ema uza ID falsu hodi “trata lider” lider sira prosesu ona ba Ministériu Públiku (MP).

“Iha loron hirak ba kotuk, ita halo ona xamada no bolu ona na’in ba ID sira ne’ebé mak pasa informasaun iha Facebook, ita bolu ona hodi halo verifikasaun, depois ita nia parte investigasaun sei kontinua prosesa ba Ministériu Públiku,” Komandante Jerál PNTL, Komisáriu Jerál Polísia, Henrique da Costa, informa ba jornalista sira hafoin halo vizita ofisial iha Sede RENETIL Faról, Kinta (13/07).

Komandante Jerál PNTL ne’e esplika, nasaun demokrasia fó ema livre, maibé tenke regulariza ho lei, nune’e mantein hato’o aspirasaun ho respeitu mutual hanesan sidadaun Timoroan ne’ebé moris ho lisan respeita malu.

PNTL ninia servisu maka bainhira iha Timoroan balun moris sente la seguru, Polísia tenke tau iha ne’ebá, maski iha perspetiva balun, ida ne’e jestu aspirasaun ema nian iha nasaun demokrátiku.

“Ba se de’it ita identifika mosu iha ne’ebá kuandu nia kontein ne’e mosu ameasa ita buka tuir”, nia hateten.

Tuir observasaun Timor Post ba prosesu identifikasaun sidadaun na’in-rua ne’ebé ho uza ID falsu hodi trata lider nasionál atuál Primeiru Ministru (PM), José Alexandre Kay Rala Xanana Gusmão, iha media sosiál (facebook) husik tiha fali, hafoin remata konfirma sira nia postajen.

Informasaun ne’ebé DIK, fó sai ba públiku katak, sira ka’er tan ona na’in ba ID Facebook ‘Ela Variana’, tanba lansa liafuan ameasa ne’ebé maka ofende lider nasionál PM Governu da-sia iha Facebook.

Kuarta 12 fulan Jullu, hale’u tuku 08:00 dadeer, iha nia hela fatin (uma aluga), ne’ebé besik Kampus Universidade da Paz (UNPAZ) área Manleuana, Suku Komoro, Postu Administrativu Dom Aleixo, munisípiu Dili.

ID facebook ‘Ela Variana’ iha rede sosiál facebook sita liafuan sira hanesan “Prontu oho Xanana ne’ebé hahalok malkriadu ba inan-feton sira ka lae, sé la brani, entaun, keta hatudu liman moos ba povu ki’ik, ne’ebé hanesan ho ita-boot”.

Iha Segunda (10/07) foin lalais, DIK halo identifikasaun ba sidadaun mane ida ho inisiál MJ ne’ebé deskonfia na’in ba ID facebook Jonh Malic, ne’ebé uza hodi lansa mós liafuan mal hasoru lider nasionál Xanana Gusmão iha Facebook.