PA RAEOA : “progresu konstrusaun Ró Haksolok atinje ona 75%”

Tatoli

DILI, 14 jullu 2023 (TATOLI)—Prezidente Autoridade (PA) Rejiaun Espesiál Oé-cusse Ambeno (RAEOA), Arsénio Paixão Bano, informa, progresu konstrusaun ró Haksolok la’o hela no daudaun ne’e atinje ona 75%.

“Kona-ba progresu ró Haksolok nian, daudaun ne’e ami prepara ona relalóriu atu aprezenta ba Governu foun no ami esplika beibeik ona ró ne’e rasik nia progresu la’o hela no daudaun atinje ona 75% finished. Novembru 2023 hotu halo tan ezersísiu tasi haree prontu ona sei lori mai Timor-Leste,” Arsénio Bano hateten, iha edifísiu Zona Espesiál Ekonomia Sosiál Merkadu, Timor- Leste (ZEESM-TL), Farol, sesta ne’e.

Nia rekoñese, Ró Haksolok ha istória barak ne’ebé dehan atu halo auditoria no kestaun seluk tan.

“Oé-cusse ne’e tama ona sistema free balance ka sistema planementu integradu servisu sentrál iha tinan-rua nia laran ona, no tama ona iha prosesu aprovasaun hosi Governu ne’e tinan-ida ho balun ona, ne’ebé kona-ba Ró Haksolok, ha’u-nia mandatu ikus ne’e sei halo hotu, garante katak sei mai,” nia akresenta.

Antes ne’e, PA RAEOA planeia tinan ne’e sei rekruta tripulante besik na’in-20 hodi tuir formasaun iha Portugal molok Ró Haksolok mai.

“Sira ne’ebé sei serbisu iha estaleiru mak bá uluk tuir formasaun iha Portugal. Ha’u atu hateten katak iha loron 28 novembru 2023 ne’e konstrusaun ró ne’e hotu, tanba ne’e maka ami hahú prepara tripulante,” Arsenio tenik.

Governu sentrál prevee orsamentu ba RAEOA iha tinan 2023 hamutuk millaun $120, kompostu hosi administrasaun millaun $84 no Fundu Espesial ba Dezenvolvimentu millaun $36, ne’ebé hosi montante millaun $36 ne’e inklui $32.000 atu fó formasaun ba tripulante Ró Haksolok.

Ró Haksolok inaugura iha loron 26 maiu 2017 iha sidade Figuerra da Foz, Portugal no tuir planu sei to’o iha outubru 2017, maibé tanba problema internál empreza ho sub-kontratór maka to’o agora ró seidauk to’o Timor-Leste.

Ró ne’e ho kustu millaun €13,7, iha kapasidade atu tula ema na’in-377 no karreta hamutuk 15. Enkuantu, prosesu konstrusaun ró, ninia kontratu asina iha 2014 entre Governu no empreza portugés maibé kontrusaun konsege paradu. Bainhira estabelese ZEESM, prosesu konstrusaun ró- ahi ne’e entrega ba autoridade RAEOA maka responsabiliza.

Desizaun atu hili ninia estaleiru, hosi V Governu Konstitusionál, ne’ebé selebra kontratu ho estaleiru Atlantic Eagle ship Building, Lda iha loron 22 setembru 2014.