Japaun Prepara Simu Traballadór Timor Oan

Foto, Facebook

Jornal Independente- Cristina Ximenes

DILI: Ministru Estadu Negósiu Estranjeiru Japaun, Takei Shunsuke, informa Governua Japaun preparadu atu simu traballadór Timor oan, maibé iha faze dahuluk sei simu uluk ema na’in 11.

"Programa formasaun tékniku no estajiáriu tékniku ba Timor oan sira ne’ebé atu ba servisu iha Japaun, parte governu Japaun hahú halo preparativu hodi simu traballadór iha faze dahuluk, ne’ebé kompostu husi ema na’in 11 hodi ba tuir formasaun no serbisu iha ne’ebá,” informa Takei Shunsuke ba jornalista sira hafoin remata enkontru ho Xefe Estadu iha Palasiu Prezidensiál, Bairu-Pite, (06/07).

Nia dehan, Timor Leste hanesan nasaun mais joven no Governu TL iha servisu ida ho forma pozitivu tebes atu bele iha kooperasaun bilaterál ne’ebé lori benefísiu ba povu ida ne’e.

Nune'e, durante reuniaun ho Prezidente Republika, José Ramos Horta ho Ministru Negósiu Estranjeiru no Kooperasaun Japaun Takei Shunsuke  hodi povu Japaun nia naran hato’o profunda respeitu ba fortelesimentu relasaun bilaterál entre nasaun rua.

Tanba ne'e, Japaun iha komitmentu bo’ot atu kontinua mantein hodi hametin relasaun bilaterál ho Timor Leste iha seitór hotu-hotu.

Nia argumenta, Japaun ho Timor Leste hanesan parseiru Importante iha Rejiaun indo Pasífiku ne’ebé kompartilla valores universál hanesan liberdade, demokrasia, direitus umanus, nu’udár Estadu direitu Demokrátiku,” Takei Shunsuke esplika.

Nia esplika, hafoin partisipa iha serimónia posse IX Governu Konstitusional, MNEK Japaun ne’e iha kedan Komunikasaun direta ho Governu foun no ne’e atu demostra de’it Japaun nia komitmentu hodi fó importánsia ba relasaun bilaterál entre Japaun ho Timor-Leste.

Entretantu, iha enkontru ne'e Prezidente Repúblika José Ramos Horta mós troka ideas ho MNEK Japaun kona-bá oinsa apoiu ne’ebé Japaun oferese ba Timor Leste iha área seguransa no apoiu formasaun hotu-hotu ne’ebé iha, ho intensaun atu tulun adezaun Timor Leste nian ba ASEAN. 

Hanesan ondra ida mai ha'u realiza vizita kortezia ne'e hodi hasoru malu ho Prezidente Repúblika durante reuniaun ha'u tranzmite ha'u nia profundu respeitu ba esforsu sira ne'ebé halo ona husi Xefe Estadu hodi hametin relasaun bilaterál ho Japaun.

Ha'u mós tranzmite ami nia intensaun hodi hametin kolaborasaun iha area sira ne'ebé kona-ba kestaun rejionais no komunidade internasionál.

Japaun ho Timor Leste nu'udar parseiru ida-ne'ebé importante tebes iha rejiaun Indo-Pasífiku ne'ebé fahe valór universál sira hanesan liberdade, demokrásia, Direitus Humanus, no mós estadu direitu.

Ha'u nia vizita mai Timor Leste ne'e realiza hafoin formasaun governu foun iha semana kotuk, hodi halo komunikasaun direita ho governu foun hatudu katak ami tau importánsia ba kooperasaun ho Timor Leste.

Ha'u mós espresa ha'u nia agradesimentu tanba bele troka ideia ho Xefe Estadu, kona-ba apoiu oi-oin ne'ebé Japaun fó ba Timor Leste, alende iha area seguransa no paz.

Ha'u simu rekomendasaun sira kona-ba relasaun entre nasaun rua espesialmente kolaborasaun ba apoiu adezaun Timor Leste ba ASEAN no ami iha servisu ida ne'ebé pozitivu tebes, Japaun apoiu adezaun Timor Leste ba ASEAN.

Kona-ba kestaun ida ne'e, programa formasaun téknika ka estajiáriu téknika agora daudauk iha hela preparativu hodi simu Timoroan 11 ba Japaun.

Iha sentidu ida ne'e ha'u sente katak Timor Leste iha kooperasaun ne'ebé sei joven no governu Timor Leste mós halo hela servisu ne'ebé pozitiva tebes iha área ida ne'e no governu Japaun mós iha komprimisiu atu koopera ho Timor Leste.