Ramos-Horta halo amiasas no ultimatum ba Primeiru-Ministru tanba Longuinhos Monteiro nia uma hetan buska

Timor Hau Nian Doben

Tuir pajina Facebook Primeiru-Ministru nian, Prezidente da Repúblika (PR), Ramos-Horta husu ba hasai Diretór SNI nian tanba ba halo buska iha Longuinhos Monteiro nia uma, se la hasai Horta sei halo buat rua: ida denunsia ba públiku, ida seluk hapara enkontru semanál ho Primeiru-Ministru.

"Kazu ida Loes, ha’u iha dia 09 ha’u viajem mai husi Kanberra mai Darwin, ha’u iha aviaun laran Senór Ministru Fidelis telephone ba ha’u dehan Prezidente da Repúblika preokupadu loos tanba SNI ba atu revista senór Longuinhos nia uma tanba ne’e husu ba Primeiru-Ministru hasai Diretór SNI nian, sei la hasai Prezidente halo buat rua ida denunsia ba públiku, ida seluk hapara enkontru semanál ho Primeiru-Ministru, ha’u iha aviaun laran ha’u responde ba Senór Ministru hateten ba Prezidente rua ne’e ha’u simu hotu, denunsia ba públiku no hapara enkontru semanal ho Primeiru-Ministru mós ha’u simu”, dehan Matan Ruak.

Tuir Taur Matan Ruak autoridade sira halo buska ho mandato tribunal nian no nia hanoin katak PR atua ho prepotensia no halo abuzu de poder. 

Ha’u to’o iha Darwin ha’u haruka ha’u nia Xefe Gabinete buka hatene saída mak akontese iha ne’ebá i kuandu ha’u buka hatene sira haruka mandatu Tribunal nian entaun ha’u hakfodak ne’e, sei ida ne’e mandatu Tribunal tanba-saida mak Prezidente fó fali ultimatu ba Primeiru-Ministru, ha’u hanoin ida ne’e abuza poder uitoan, prepotensia uitoan husi Parte Prezidente da Repúblika nian ké labele, Prezidente da Repúblika orgaun no simbolu nasaun nian entaun tenke sukat nia komportamentu hotu ne’e nia sukat kuidadu loos labele hanesan fali 𝐜𝐨𝐛𝐨𝐢𝐚𝐝𝐚 demais, iha Timor ne’e laiha ema ida iha lei nia leten inklui Prezidente da Repúblika, hotu-hotu iha lei nia okos, ha’u eis Prezidente ne’ebé ha’u hatene saída mak ha’u koalia, ha’u preokupa uitoan mas ita aprende dalaruma sira ne’ebé fó informasaun ba Nai Prezidente fó sala depois Prezidente envez rona ho kalma lae, bidu uluk mak entaun mak hanesan ne’e", ramata.

“Ramos-Horta halo dala barak intervensaun ba orgaun sobernia sira seluk, ida maka halo kritikas makaas ba Tribunal no halo duvidas iha publiku nia leet se PR ida ne’e beikteen no la hatene nia knaar hanesan Xefe Estadu ka nia sai ema ditador hanesan Suharto”, dehan deputadu ida ba Timor Hau Nian Doben.