PCIC kaptura ona Ramos-Horta nia asessor, Longuinhos Monteiro

Timor Hau Nian Doben

Asessor Prezidente da Repúblika Ramos-Horta nian, Longuinhos Monteiro,  hetan kapturasaun horseik hosi  Polísia Sientifica Investigasaun Kriminal (PSIC) tanba autoridade sira hetan kilat fogu ilegal no munisoens iha niniaa rezidensia iha Likisa.

Tuir ajensia Lusa Longuinhos Monteiro hetan deteinsaun horseik no PCIC halo primeiru interrogatoriu no hetan detensaun to'o Tribunal Distrital Díli aplika ba nia medidas koasaun no tuir lei medida sira ne'e tenke fo'o sai iha 72 oras nia laran.

Iha rusga ke autoridade sira halo iha Monteiro nia uma, sira hetan "kilat balun, munisaun, hanesan pistola ida, kilat nain tolu tan, arco automático ida no munisoes ba kilat oin seluk ne'ebe inklui ba  m16 no Glock19".

Timor Hau Nian Doben rona deputadu ida ne'ebe lakoi fo'o sai naran, nia husu ba Tribunal ba aplika prizaun preventiva  tanba krimi Longuinhos komete, krimi ida ke boot no bele jera instabilidade iha Timor-Leste.

"Ha'u espera katak sira aplika prizaun preventiva ba Longuinhos Monteiro tanba nia komete krimi boot ida hasoru nasaun Timor-Leste no kilat sira ne'e nia rai atu halo saida? Ema hanesan Longuinhos tenke halo investigasaun profundu no klean tanba nia bele halo servisu ba ema seluk hodi kria instabilidade no hatauk povu", dehan. 

Fonte ida ne'e mos husu ba Prezidente Ramos-Horta " atu suspende asessor ida ne'e to'o investigasaun ramata no Tribunal foti desizaun ida, tanba Prezidensia Repúblika la bele iha asossiasaun ho ema ida ke sai suspeito hanesan kriminozu ida nomos hetan alegasaun katak komete krimi ida ke bele kria instabilidade iha rai laran".

Longuinhos Monteiro hetan kargu oin-oin bainhira Xanana no CNRT  ukun: Ministru Interior no Komandante Polisia Nasional Timor-Leste no nia ema ke besik teb-tebes Xanana Gusmão,  ema barak akuza Longuinhos hanesan autor ida ba krimi boot ida iha rai laran, krizi 2006.