Governu ‘Hasai’ Xanana iha Prosesu Dezenvolvimentu Greater Sunrise

Tempo Timor

Tempotimor (Dili)-Governu hasai lider nasionál, Kay Rala Xanana Gusmão nia involvimentu iha prosesu dezenvolvimentu Greater Sunrise iha Kosta Súl, tanba iha ona regulamentu entre estadu Austrália ho Timor-Leste atu la’o tuir.

Nune’e, governu sei la envolve tán Xanana Gusmão iha prosesu dezenvolvimentu Griter Sunrise nian.

"Tanba, artigu sira la hakerek kona-ba ida ne'e, ne'e entre estadu rua (Austrália no Timor-Leste) iha nivel bilaterral no trilaterál ida ne'e mak regula", dehan Minístru Petroleu Minerais (MPM), Vitor da Conceição, hafoin sorumutu ho Primeiru Ministru, Taur Matan Ruak, iha palásiu Governu, segunda (05/12).

Antes ne'e, Governu iha desizaun kona-ba tratadu fronteira marrítima konsege manán no asina iha tinan kotuk liu ba iha Nova Yorke.

Nia hatutan, kona-ba dezenvolvimentu Kosta Súl ne'e, dokumentu hotu prepara tiha ona no hein kompaña sira servisu tuir regulamentu.

"Ha'u hanoin kona-ba tratadu marrítima ba griter sunrise ne'e, ha'u hanoin halo tiha ona, ne'e sai hanesan referensia legal enkudramentu legal lei, baze ne'ebé dadaun kona-ba dezenvolvimentu do kampu ne'e, ha'u hanoin ida ne'e mak referensia atu halo tuir, ida ne'e de'it, ne'e duni ha'u hanoin ba tratadu marrítima ba griter sunrise hotu tiha ona, klaru dokumentu iha tiha ona, agora servisu tuir ida ne'e de'it", dehan nia.

Nia dehan, novidade ne'ebé presiza hala'o mak aliñamentu entre estadu rua ne'e, tanba ne'e produz ona dokumentu lubuk ida ne'ebé iha ona korkondansia hatun ba joint venture sira ne'ebé halo tra-parte (trilaterál).

"Agora joint venture trilateral, sira atu buka sira nia deferensa ne'e bele konklui ba faze ida bilaterral ne'e, ne'ebé la iha tan problema ho estadu rua ne'e", nia afirma.

Nune’e, dezenvovimentu Griter Sunrise nia progressu la'o nafatin, kona-ba bloku sira uluk halo konkursu públiku, agora iha ona prosesu elaborasaun, negósiasaun ba rai maran no iha tasi laran.

Tanba ne’e, Governu Timor-Leste no Austrália ninia entendimentu la'o di'ak no rejime fiskal dezenvolvimentu Griter Sunrise ne'e, hetan ona konkordansia husi Governu Australia katak, sei regula ho lei Timor nian. (*)

Foto, Facebook.