Aban, Governu Halo Lansamentu Subsídiu $200 Iha Dili

Independente - Saturnina Costa

DILI: Governu liu husi Ministeriu Solidariedade Sosial no Inkluzasaun Sosial, hamutuk ho Ministeriu Administrasaun Estatal, aban (06/12), sei hahú lansa pagamentu subsídiu fim-do-anu $200 ba uma-kain sira, iha Kapital Dili.

Diretór Jéral Administrasaun no Finansas, iha MSSI, Rui Manuel Expostu, hatete, lansamentu ne’e sei hahú uluk iha Suku Becora, Camea, Lahane Oriental no Suku Comoro, iha Munisípiu Díli.

Hafoin lansamentu, ekipa pagamentu kontinua hala’o kedas pagamentu ba uma-kain elijivel, maibé ba Munisípiu sira seluk inklui RAEOA, pagamentu sei realiza iha Loron 12 Dezembru. Tuir kalendáriu pagamentu subsídiu ida ne’e sei remata iha loron 22 Dezembru 2022.

“Bazeia ba Dekretu Lei Nú. 37/2022, 25 de Maiu ne’ebé hetan alterasaun husi Dekretu Lei Nú.82/2022, 11 de Novembru katak, uma-kain ou benefisiáriu sira ne’ebé mak elijivel ba programa subsídiu fim-do-ano mak, uma-kain hirak ne’ebé, la iha ninia membru uma-kain hetan rendimentu kada fulan ho forma regular dolar amerikanu $500 ou liu, no mós uma-kain ne’ebé rejistu ona iha livru rejistu uma-kain iha suku iha teritóriu nasionál to’o loron 28 Fevereiru 2022,”dehan nia liu husi konferensia imprensa, iha Edifísiu Sentrál MSSI-Kaikoli-Díli, segunda ne’e (05/12).

Diretór Jerál hatutan, ba benefisiáriu hotu ne’ebé elijivel sei priense formuláriu deklarasaun rendimentu ki’ik husi dolar amerikanu $500 ka liu, iha fatin pagamentu molok simu pagamentu subsídiu refere.

Aleinde, ba benefisiáriu sira ne’ebé ho rendimentu dolar amerikanu $500 no nia simu subsídiu ida ne’e, mak nia sei sujeitu ba responsabilidade kriminál tuir lei haruka.

Nia haktuir, bainhira iha prosesu pagamentu, dokumentus ne’ebé benifisiariu sira sei lori mak hansan, fixa familia original, kartaun eleitoral, bileti identidade no mós pasaporte.

Enkuantu, atu realiza pagamentu ida ne’e, MSSI servisu hamutuk ho Banku Nasionál Komersiu Timor-Leste (BNCTL-Sigla Portugés), hodi transporta osan ba Postu Administrativu sira, hafoin autoridade Munisipal ho ekipa pagamentu sei ba foti osan ne’e, hodi ba iha Suku hanesan fatin ba pagamentu nian.

Entretantu, tuir dadus finál ne’ebé Ministériu Administrasaun Estatal (MAE) envia ba MSSI, iha uma-kain hamutuk 339,954 mak elijivel ba subsídiu ida ne’e. ho nia orsamentu ne’ebé atu selu hamutuk dolar amerikau U$ 67.990.800.