Ramos-Horta:”Ximenes Belo sei iha Timor nia respeito maski hetan akuzasaun abuzu sexual hasoru labarik"

Timor Hau Nian Doben

Prezidente Repúblika, Ramos-Horta, iha entrevista ida ba kanal televizivu CNN Portugal dehan katak maski eis Bispo Timor Oan, Dom Ximenes Belo, hetan akuzasaun katak halo violasaun hasoru labarik sira iha Timor-Leste, Belo sei iha nafatin Timor Oan sira nia respeito tomak.

Xefe de Estadu haktuir ke akuzasaun sira hasoru Dom Ximenes Belo la halakon Bispo nia imajen iha Timor-Leste no tuir Horta nia hanoin katak tenki iha respeito ba vitima sira maibe kazu ida ne’e kompetensia Igreja Katolika nian.

 “Ami la ba estraga História ka halakon kontribuisaun Dom Ximenes Belo fo’o ba Timor nia kauza no nia kontinua hetan respeitu boot nafatin iha ami nia nasaun no ami akompanha (kazu ne'e) ho possibilidade ami iha ho respeitu ba vitima sira nomos (respeito) ba desizaun Santa Sé nian”, deklara Ramos-Horta ba CNN Portugal.

Horta afirma katak nia la hatene Belo nia paradeiro (hela fatin) no dehan tan ke eis Bispo nia luta ba libertasaun tenke separa hosi polemika ida ne’e.

Dom Ximenes Belo hetan akuzasaun abuzu sexual ba labarik sira iha Timor iha dekada 1980, 1990 no hetan ona sansaun hosi Vatikano.

Iha fulan Outubru tinan ida ne’e representante Vatikano nian iha Díli, Marco Sprizzi, fo’o sae deklarasaun ke Vatikano fo’o ona “kastigus” ba Ximenes Belo no eis Bispu simu tiha ona “kastigus” sira ne’e.

"Kastigus" ba Amu Belo  ke Santa Sé aplika maka: Dom Ximenes labele iha kontakto voluntariu ho labarik menoridade sira no labele mos iha kontakto ka fila ba Timor-Leste. Reprezentante Santa Sé explika katak “ kastigus” sira ne’e “todan tebes maibe kazu ida ne’e seriu tebes no krimes graves”.