PN Preokupa Demostrasaun Iha UNTL, Matan Ruak Orienta PNTL Blokeia Dalan

Timor Post -Mario da Costa

DILI (timorpost.com) – Parlamentu Nasionál (PN), preokupa ho asaun demonstrasaun husi estudante Universidade sira hotu ne’ebé hanaran Aliansa Maubere Nasionál (AMN), Primeiru Ministru no Ministru Interiór, Taur Matan Ruak, orienta Polísia Nasionál Timor- Leste (PNTL) blokeia estrada iha Parlamentu Nasionál nia oin.

“Manifestasaun ne’e direitu liberdade sidadaun ida-idak ninian kuandu la viola regras ka lei ruma, bele halo iha ne’ebé de’it, no ita la kestiona ida ne’e maibé ita kestiona tanba perturba funsionamentu órgaun soberania no konteudu manifestasaun ne’e halo insulta no akuzasaun falsu ida ne’e mak ita kestiona,” dehan Prezidente Parlamentu Nasionál, Aniceto Longuinhos Guterres, iha Plenaria Parlamentu Nasionál, Kuarta (16/11).

Nia aumenta, maibé agora iha fatin seluk Universidade nafatin autoriza ka la autoriza husi Reitór Universidade sira ida-idak ne’e kestaun interna instituisaun ida-idak ninian. 

“Basta ita informadu kona-ba asaun sira ne’ebé la’o tiha ona iha kampus sentrál UNTL, agora sira muda tiha ona ba iha fatin seluk hodi bele espresa sira-nia direitu,” deklara nia.

Iha fatin hanesan, Primeiru Ministru (PM), Taur Matan Ruak, hanesan mós Ministru Interiór (MI), deklara nia parte orienta ona Polísia Nasionál Timor-Leste, hodi blokeia tiha dalan ida diresaun husi Kampu Demokrasia mai iha Parlamentu Nasionál nia oin, nune’e mós husi Pateo nian mai resintu Universidade Nasionál Timor Lorosa’e (UNTL).

“Ministru Interiór fó orden para blokeia dalan tama mai iha ne’e, no haruka sira ba fali iha Jardín 05 de Maiu, iha area Kolmera ninian, ha’u espera ke sira kumpre ida ne’e,” dehan iha Parlamentu Nasionál.

Nune’e mós Prezidente Komisaun (G) Parlamentu Nasionál ne’ebé trata ba asuntus Edukasaun, Juventude, Desportu, Kultura no Sidadania, Deputadu António Verdial, dehan tuir karta ne’ebé sira simu husi Reitór UNTL, João Martins, katak nia parte laiha kuñesementu la autoriza fatin UNTL ne’e hodi halo demonstrasaun.

“Tuir karta husi Reitór UNTL katak, atividade ne’e la’ós UNTL mak prepara, no informasaun manifestasaun ne’ebé halo husi grupu AMN iha resintu UNTL kompostu husi estudante UNTL balun no estudante Universidade privadu sira seluk inklui ema privadu balun, laiha kuñesementu husi UNTL,” dehan Verdial.

Tanba ne’e mak iha loron 08 fulan Novembru UNTL halo ona intervensaun direita ba asaun manifestasaun husi grupu Aliansa Maubere Nasionál (AMN) refere.

“Ami halo ona intervensaun tanba prezudika prosesu aprendizajen ne’ebé tama ona ba faze ezame teste trimestral ninian, no daudaun ne’e UNTL halo hela preparasaun ba Dias Natalis liuhusi atividade extra-kurikular, nune’e asaun ne’ebé grupu AMN halo fó perturbasaun ba atividade Universidade nian, nune’e mós implika ba funsionáriu sira-nia servisu iha Universidade,” nia hakotu.