Ohin, ‘Maubere Bolu’ ba Asaun Kontra PN Fulan Rua

Independente - Domingos Gomes

DILI: Sosiadade sivil no Estudante Universitariu sira ne’ebé envolve an iha Aliansa Maubere Nasionál, sei halo asaun pasifika ida hasoru Parlamentu Nasionál relasiona ho desizaun deputadu sira nian atu sosa karreta pajero sport 30 no laptop.

Aliansa Maubere Nasionál (AMN) haruka karta pedidu ba Polisia Nasionál Timor-Leste (PNTL) hodi husu autorizasaun atu realiza asaun pasifika iha Kampus Sentral Universidade Nasionál Timor Lorosa’e (UNTL). Karta refere haruka ba PNTL iha 27 Outubru 2022.

Tuir karta ne’ebé jornal INDEPENDENTE asesu, AMN informa ba PNTL kona-ba asaun pasifika ne’ebé sei realiza hahú husi 7 Novembru, ohin.

“AMN sei halo asaun pasifika semana ida dala tolu (iha loron Segunda, Tersa no Kuarta), durante fulan rua, hahú husi loron 7 fulan Novembru 2022,” informa AMN liu husi sira-nia karta ba Komandante PNTL Munisipiu Dili, Superintendente Xefe polisia Henrique da Costa, ne’ebé jornal INDEPENDENTE asesu, Sabadu (05/11).

Tan ne’e, iha karta refere, AMN husu PNTL ninia kooperasaun no kolaborasaun hodi bele garante asaun pasifika ne’ebé estudante sira sei hala’o.

“Preparadu ona, aban (ohin) loron 07 Novembru ami sei halo manifestaun hasoru deputadu sira iha PN, maske PNTL la resposta ami-nia karta mós ami prontu atu halo manifestasaun,” dehan Portavos AMN, Gaspar Maugamu, ba jornalista Jornal INDEPENDENTE via telefone, Domingu (06/11).

Tuir nia, bainhira grupu ka individu balun hato’o pedidu ba PNTL no parte PNTL la aseita, presiza fó resposta, maibé to’o ohin laiha resporta signifika PNTL konkorda ona ho asaun manifestaun ne’ebé AMN sei hala’o.

Tuir planu, AMN sei hahú nia asaun pasifiku iha 7 Novembru tuku 08:00 dader to’o 06:30 loraik Oras Timor-Leste.

Aleinde kontra PN sosa pajero sport no laptop ba deputadu sira, tuir pamfletu balun ne’ebé AMN lansa ba públiku, iha manifestasaun durante fulan rua ne’e sei kestiona mós benefisiu husi Orsamentu Jeral Estadu (OJE) kada tinan ba povu, Lei Pensaun Mensal Vitalisia no númeru 1/2006 kona-ba Impede Liberdade Manifestasaun.

Entretantu, jornalista jornal INDEPENDENTE koko konfirma asuntu ne’e Komando PNTL, maibé la hetan resposta.

Foto, Facebook.