Karreta Pajero Sport Haat ba Operasionál Para Ona iha PN

Independente -Aquino Gomes

DILI: Kareta Pajero Sport unidade haat ne’ebé Parlamentu Nasionál sosa ba operasional nian to’o ona. Karreta refere sei utiliza ba servisu operasional Parlamentu Nasionál nian.

Sekretáriu Jerál PN, Adelino Afonso de Jesus informa, daudauk ne’e Pajero Sport unidade haat para ona iha resintu Parlamentu Nasionál.

Karreta haat ne’e, nia hatete, la'ós ba deputadu sira, maibé karreta refere ba operasionál PN nian.

"La sosá karreta ba deputadu sira maibé Parlamentu Nasionál sosa de'it karreta operasionál, karreta haat, mak ne'e de'it," dehan nia via telefone ba Jornalista Jornál INDEPENDENTE, Kinta (03/11).

Osan ba sosa karreta haat ne’e, nia dehan, prevé iha Orsamentu Privativu Parlamentu Nasionál nian ba tinan fiskál 2022.

Ba montante orsamentu no folin karreta kada unidade, Sekjer PN ne’e lakohi fó komentariu.

Iha fatin ketak, Vise Reitór Datoluk Universidade Dili, Hugo Lourenço da Costa, kestiona maske PN sosá ona karreta Pajero Sport ba operasionál, maibé iha tinan 2023 kontinua sosa karreta 30 ho tipu hanesan ba deputadu sira.

"Ha'u hanoin Parlamentu Nasionál la hatudu sira-nia pozisaun hanesan reprezentante povu," dehan nia.

Tuir loloos, nia dehan, PN tenke haree ba krize no situasaun ekonómia ne'ebé halo povu moris iha susar nia laran.

"Tanba hanoin hahalok sira hanesan ne'e hatudu katak ita-nia Parlamentu Nasionál normalmente lakon ona figura hanesan reprezentante povu.”

"Parlamentu hola ona Pajero Sport, maibé tinan oin kontinua hola nafatin, hanoin imajen Parlamentu Nasionál monu tebes, sira-nia hanoin atu sosá nafatin karreta," katak nia.

Molok ne’e, deputadu sira iha Parlamentu Nasionál aprova orsamentu millaun $1 resin ne’ebé aloka ba sosa karreta foun 30 ba deputadu sira. Desizaun ne’e foti liu husi diskusaun no aprovasaun ba proposta orsamentu privativu Parlamentu Nasionál nian ba tinan fiskal 2023.

Husi total orsamentu millaun $1.950 ne’ebé aloka ba sosa karreta foun ne’e, kada karreta sei sosa ho folin rihun $65.

Proposta sosa karreta ne’e hetan aprovasaun ho votus a favor 45, kontra ida no abstensaun 11.

Vise Prezidente bankada Fretilin, Antoninho Bianco husu atu lejislatura dalima di’ak liu foku ba objetivu saida mak atu halo no intrega sosa karreta foun ba lejislatura tuir mai.

"Agora ita sosa tan karreta, ha'u hanoin proposta ne'e elimina tiha, husik aban-bainrua Sexta Lejislatura mesak halo, ne'ebé Kinta Lejislatura ko'alia saida mak ita atu halo," dehan nia molok aprova orsamentu privativu PN, Segunda (03/10).

Vise Prezidente Bankada PLP, Francisco de Vasconcelhos preokupa ho folin karreta ne’ebé sa’e ona ba rihun $65.

Francisco dehan, PN bele kompleta karreta 30 nune’e deputadu na’in 65 bele sa’e karreta foun maibé tenke haree ba nia presu ne’ebé razoavel.

“Kompleta bele maibé nia presu ne'e razoavel ka lae? Presu ida uluk $40 mill depois agora $65 mill," dehan nia.

Tan ne’e, tuir nia atu labele hatodan liu pezu orsamentu PN nian, di’ak liu hasai tiha osan ba sosa karreta foun, husik aban-bairua deputadu foun mai mak haree fali nia orsamentu.

Prezidente Bankada CNRT, Duarte Nunes hatete, desizaun sosa karreta foun ba deputadu ne’e seidauk final, katak bele mosu proposta alterasaun iha diskusaun no aprovasaun Orsamentu Jeral Estadu 2023.

Maske nune’e, Duarte labele fó garante katak bankada ne’ebé nia lidera sei aprezenta proposta ida hodi hasai proposta sosa karreta foun ba deputadu sira.

"Sei iha desizaun ikus maibé ami sei konsulta malu tanba depende mós maioria ho minoria sei mosu iha PN tuir mai hola desizaun kona-ba situasaun ne'e," dehan nia.