Estudante Halo Demonstrasaun, Parlamentu Nasionál Kontinua Hola Karreta

 

Timor Post - Mário da Costa

DILI (timorpost.com) – Vise-Prezidente Parlamentu Nasionál, Luis Roberto, hatete sira sei kontinua hola karreta tanba presiza duni halo servisu, maski estudante Unidade sira halo demonstrasaun kontra sira.

“Ha’u hanoin estudante sira ohin iha li’ur halo manifestasaun hasoru Parlamentu Nasionál, kona-ba atu sosa karreta foun ba Deputadu sira inklui Lap-Top ne’e, ha’u hanoin la’ós impaktu boot ida,” nia hateten iha Parlamentu Nasionál, Segunda (07/11).

Nia dehan, tanba órgaun soberanu ida ne’e presiza duni transporte atu bele halo servisu, tanba ne’e kompeténsia sei liuhusi debate no halo aprovasaun.

“Ha’u husu ba joven no estudante sira nusa la halo demonstrasaun ba dezenvolvimentu sira la la’o ne’e karik importante, la’ós halo fali manifestasaun ba Parlamentu atu sosa karreta ka la sosa no sosa Lap-Top ka la sosa,” dehan nia.

Tanba ida ne’e la’ós fó impaktu boot ba dezenvolvimentu lae, ho ida ne’e di’ak liu joven no estudante sira halo demonstrasaun ba dezenvolvimentu sira la la’o ne’e bele tanba ida ne’e importante tebes.

“Maibé ideia no hanoin sira inklui argumenta sira ne’e Parlamentu Nasionál sempre simu no sei tetu atu sosa ka lae, tanba ne’e desizaun krusiál, klaru estudante sira halo demonstrasaun ne’e mós iha razaun, maibé polítika Parlamentu sira presiza haree didi’ak lai, tanba ida ne’e mós importante tanba nia impaktu halai hotu ba OJE,” nia konfesa.

Nia reforsa, orsamentu atu sosa karreta foun no Lap-Top ba Deputadu sira ne’e depende ba sira foun mai ne’e, maski nia orsamentu iha hotu OJE 2023 ne’e nia laran.

“Maibé ha’u fiar Deputadu sira agora ultimo mandatu ne’e sei la hola ona karreta foun, tanba karreta sira agora uza halo servisu ne’e di’ak hela, agora atu sosa foun ne’e depende ba sira foun atu mai ne’e,” nia hakotu.”