Benefisiáriu subsídiu $200 tenke deklara rendimentu mensál la liu $500

Tatoli - Antónia Gusmão 

DILI, 09 novembru 2022 (TATOLI)–Governu liuhosi reuniaun Konsellu Ministru (KM) ordinária, kuarta ne’e, aprova projetu dekretu-lei, ne’ebé aprezenta hosi Primeiru-Ministru (PM), Taur Matan Ruak, ne’ebé halo alterasaun dahuluk ba dekretu-lei númeru 37/2022, loron 25 maiu, kona-ba subsídiu fim do ano ba ‘uma kain’ ho valór $200, hodi klarifika ba aplikasaun.

Prezidénsia Konsellu Ministru, Fidelis Manuel Leite Magalhães, esplika, benefisiáriu ba programa ne’e maka agregadu família sira ne’ebé rejistu ona to’o loron 28 fevereiru 2022 iha livru rejistu uma-kain, ne’ebé daudaun ne’e iha territóriu nasionál no laiha elementu ida mak simu rendimentu fulan-fulan ho forma regulár hosi servisu instituisaun públika ka entidade privada, rendimentu emprezariál, rendimentu prediál ka rendimentu sira ne’ebé hetan hosi prestasaun sosiál liuhosi rejime kontributivu, la kontributivu, ka espesiál, ne’ebé ninia valór a’as liu $500.

“Ho alterasaun ne’e hodi bele simu pagamentu, reprezentante uma-kain ne’ebé sai benefisiáriu tenke subskreve deklarasaun ida hodi konfirma katak laiha membru ida hosi uma-kain ne’ebé regulár simu fulan-fulan rendimentu a’as liu do que $500,” Prezidénsia Fidelis Manuel Leite Magalhães, relata hafoin reuniaun ezekutivu, iha Palásiu Governu.

Aleinde ne’e, reprezentante hosi uma-kain ne’ebé subskreve deklarasaun bainhira hatene katak saida maka deklara ne’e la loos, maka iha obrigasaun atu fó filafali valór ne’ebé simu ba Estadu, tanba se lae bele iha responsabilidade kriminál tuir lei haruka.

Antes ne’e, molok halo alterasaun ba dekretu-lei ne’e, Governu deside uma-kain hotu iha territóriu tomak sei simu subsídiu fim do ano ba uma-kain $200.

Governu liuhosi Ministériu Solidariedade Sosiál no Inkluzaun (MSSI) planeia ona halo abertura ba atribuisaun subsídiu ne’e iha loron 16 novembru 2022.

Ministériu Administrasaun Estatál (MAE) submete ona dadus uma-kain 39.000 ba Ministériu Solidaridade Sosiál no Inkluzaun (MSSI) ho totál pagamentu millaun $7,8 resin.

Foto, Facebook.