Vise MI Rejeita Informasaun Demite Diretór SNI

Timor Post - Reportajen : Jaime Pires Editor : Mario Da Costa

DILI (timorpost.com) - Vise-Ministru Interiór (V-MI), António Armindo, rejeita informasaun katak atu halo demisaun ba Diretór Servisu Nasionál Intelijénsia (SNI), Gastão Piedade, tanba trava osan iha Aeroportu Internasionál Prezidente Nicolau Lobato Komoro foin lalais.

Nia hatete, hafoin kazu iha Aeroportu, nia parte seidauk halo karta ruma haruka ba Komisáriu Polísia Nasionál Timor-Leste (PNTL), hodi deside at demite Diretór ServisuNasionál Intelijénsia (SNI), Gastão Piedade.

"Ha'u atu hateten de'it katak, depois de kazu osan rihun 130USD, iha Aeroportu, Vise-Ministru seidauk halo karta ruma hodi haruka ba Komandu PNTL", dehan Vise-Ministru Interiór V-MI), António Armindo, ba Timor Post Online liuhosi nia facebook ofisial, Kuarta (12/10).

Nia dehan, tanba tuir nia hatene, membru Polísia Nasionál Timor-Leste, Ajente Xefe, Gastão Piedade, daudaun ne'e servisu ba iha Servisu Nasionál Intelijénsia (SNI) nian ho temporáriamente la'ós ho PNTL.

"Ne'ebé informasaun ne'ebé fó sai ha média dean, haruka karta ba at demite Diretór SNI ne'e falsu, tanba ha'u seidauk halo karta ida ba Komisáriu PNTL," hateten nia.

Armindo afirma tan, ho ida ne'e nia parte afirma ba públiku katak, hafoin akontesimentu kazu ha Aeroportu Internasionál Nicolau Lobato Komoro, semana kotuk liubá, nia parte seidauk halo karta ida haruka ba PNTL.

Fó hanoin fali katak, relasiona ho Partidu KHUNTO nia osan ho montante rihun 130 USD ne'ebé Autoridade seguransa sira prende iha Aeroportu tanba, la tuir proses normál ka komete krime Brankamentu kapitais.

Ho ida ne'e, Konselleiru másimu Partidu KHUNTO, José dos Santos "Naimori Bukar" lalin nia membru Governu na'in-rua, hanesan Vise-Ministru Justisa, Edmundo Caetano no Vise- Ministru Interiór, António Armindo, ba kedas SNI nia fatin hodi halo intervensaun atu husu entrega fali sira-nia osan no impede labele halo proses kontinuasaun.

Foto, Tatoli