Taur: Governu Sei Halo Intervensaun Rigorozu ba Ajénsia Ilegal

Independente - Cristina Ximenes

DILI: Governu promete sei halo intervensaun rigorozu ba ajénsia Ilegal sira ne'ebé tenta fasilita Timor oan ba rai li'ur, maibé la toma responsabilida no ikus mai halo timor oan barak tenke terus iha ema nia rai.

Primeiru Ministru (PM), Taur Matan Ruak hateten, governu presiza halo intervensaun rigorozu ba ajénsia ilegal sira ne'ebé fasilita Timor sira ba rai li'ur hanesan Portugál no nasaun sira seluk.

"Governu presiza halo intervensaun rigorozu ba ajénsia ilegal sira, hanesan ita boot sira hare foin lalais kaptura ona balun. Ida ne'e kompetensia justisa nia no justisa mak sei hare saida maka governu preokupa, informa Taur Matan Ruak ba Jornalista hafoin remata enkontru semanál ho Prezidente Repúblika, José Ramos iha Palásiu Prezidensiál, Bairu-Pite, (27/10).

Nia haktuir, emprinsipiu ema hotu iha liberdade atu ba fatin hotu, ida ne'e laiha ema atu impede, maibé  tenke kumpri regras hanesan, ita nia joven  balun ba Malázia, Indonézia ne’e inventa tiha KTP no to’o muda naran, depois ema deporta sira.

Taur preokupa ema balun selu aviaun to'o ne'ebá, maibé se mak fó han, balun ba toba fali Estrada, depois malae mak lori fali bee no hahán ba sira.

"Ita labele ba to'o pontu ida hanesan ne'e, tanba tempu Indonézia no Portuges nia tempu ita la halo hanesan ne'e, agora Timor ukun an ona mak halo fali hanesan ne'e susar fali, ita atu halo tuir fali ema Áfrika ka ema sira iha media oriente ou rai sira funu ne'e susar, tanba ne'e ha'u husu para hotu hotu iha pasiensia oituan tuir dalan labele prejudika sira nia an. Situasaun sira hanesan ne'e halo ita iha lista mean,” tenik nia.

Tuir nia, Timor oan ba fatin fatin mak baku malu tuda malu entaun Timor nia naran ne'e la di'ak sira mak halo maibé  hotu la di'ak Timor la di'ak entaun Timor kuandua ba mak tuda malu ida baku malu dokumentu la iha no ida toba iha rai no tan ne'e husu para lao tuir dalan.

Antes ne’e, autoridade Seguransa no Defeza kompostu husi Servisu Nasionál Intelijénsia (SNI), Servisu Informasaun Polísia (SIP), Servisu Informasaun Militár ho J2 FALINTIL-Forsa Defeza Timor Leste (F-FDTL) detein diretór ajénsia balun, tanba deskonfia iha relasaun ho kazu timoroan lubun ne’ebé  sai vítima no abandona iha Portugál, inklui timor oan balun ne’ebé la konsege bá Portugál maske hatama osan ho montante $3000 kada ema.

Detensaun bá diretór ajénsia viajen ida ho inisiál SM, Sesta (21/10), bazeia bá mandadu hosi Tribunál Distritál Díli (TDD) ho Númeru Úniku Krime (NUC, sigla portugés) 215/22.PNSIK, hodi lori kedas bá sela detensaun durante oras 72 hodi hein submete bá primeiru interrogatóriu iha TDD.

Iha operasaun buska no detensaun ne’e, autoridade polisiál Timor nian  identifika katak    ajénsia viajen ne’e nu’udár mós ajénsia viajen ida hosi ajénsia viajen sira seluk ne’ebé eziste iha Timor no durante ne’e fasilita Timoroan liu  na’in-3000 bá servisu iha Portugál no nasaun sira Eropa nian, maibé realidade timoroan sira ne’e maioria abandonu hela iha Portugál hodi toba de’it iha jardín sira iha sidade Lizboa no fatin seluk tan iha Portugál.

Ekipa operasaun konjunta mós foti informasaun no identifika timoroan, mesak joven de’it, hamutuk na’in-14 ne’ebé mak konsidera hanesan vítima bá ajénsia viajen ne’e tanba sira hotu hatama tiha ona osan hamutuk $40,000-resin, maibé sira-nia viajen to’o de’it iha Bali-Indonézia no la konsege halo viajen liubá Portugal.

Foto, Facebook