Membru Governu Laiha Kompeténsia Ezonera Gastão

Timor Post - Jaime Pires

DILI (timorpost.com) – Prezidente Komisaun B, trata asuntu Defeza, Seguransa, Negósiu Estranjeiru iha Parlamentu Nasionál, José Agustinho Siqueira Somotxo, hatete membru Governu laiha kompeténsia hakerek karta atu ezonera Diretór Servisu Nasionál Intelijénsia (SNI), Gastão Piedade.

Nia hatete, pior liután Vise Ministru na’in-tolu hakerek karta ne’e hanesan labarik sira eskola Primaria.

“Ida ne’e ha’u hamnasa tanba la’ós membru Governu na’in-3 ne’e nia kompeténsia atu ezonera, tanba Gastão Piedade, servisu ba SNI no iha Gabinete Primeiru Ministru nia okos,” nia hateten iha Parlamentu Nasionál, Sábadu (15/10).

Nia dehan, Vise-Ministru na’in-3 ne’e nia servisu husi ne’ebé mak iha kompeténsia atu ezonera fali Diretór investigasaun Servisu Nasionál Intelijénsia, Gastão Piedade ne’e.

“Karta espalla ona iha média sosiál ha’u seidauk Lee, maibé kolega sira barak mak Lee ona katak, ne’e hanesan labarik ki’ikoan sira mak halo karta la’ós autoridade nia karta, tanba hanesan SD sira mak halo karta,” hateten nia.

Tanba klasifikasaun polítika sira halo ba karta ne’e dehan, SD sira mak hakerek karta ne’e la’ós ema SMA ka Universidade mak halo karta ne’e.

“Tanba ne’e ha’u konvoka ona katak iha loron 18 fulan Outubru tinan ida ne’e, ami sei bolu hotu sira hodi mai hatán, kona-ba ida ne’e,” deklara nia.

Enkuantu Vise-Ministru na’in-3, hanesan Vise- Ministru Justisa, Edmundo Caetano, Vise- Ministru Interiór, António Armindo no Vise- Ministru Obras Públikas, Nicolau Lino Freitas Belo, haruka karta ba atu ezonera, membru PNTL Ajente Xefe Gastão Piedade, hanesan Diretór Investigasaun Servisu Nasionál Intelijénsia, relasiona ho kazu osan Partidu KHUNTO nian ho montante 1.300 USD ne’ebé prende iha Aeroportu Nicolau Lobato Komoro, foin lalais.

Foto, Facebook.