KAK halo tan buskas iha Palasiu Governu no konfiska dokumentus no komputador

Timor Hau Nian Doben

Tuir ajensia Lusa, Komissaun Anti Korrupsaun (KAK) ninia ajentes ohin halo tan buskas iha Palasiu Governu relasiona ho kazu set top box RTTL.

“Operasaun ida ne’e KAK rasik fo’o sai iha Facebook no sira halo buskas iha eskritorius  Ministeriu Assuntus Parlamentares nomos Ministeriu Komnikasaun Sosial nian, sira konfiska kaixa balun ho dokumentus no material sira seluk, inkluindu komputador portátil ida”, hakerek Lusa.

Iha semana kotuk Komissaun Anti Korrupsaun kaer ona ema nain rua relasiona ho alegadu krimi ida ne’e (settop  box RTTL, EP)  no sira nain rua hetan ona husi Tribunal Distrital Dili medida koasaun Termus Identifikasaun no Rezidensia, aprezentasaun periodika no proibisaun sai hosi Timor-Leste.

Tuir Lusa, investigasaum ida ne’e indisia katak ministru ida ne’e favorese ninia sekretaria iha prezidensia FFTL nian no fo’o kontratu ba nia ho valor besik 900 mil dólares.

Sergio Hornai hosi KAK nia dehan ba Lusa katak, “kazu ida ne’e sira alegadus kazus de krime partisipasaun ekonómika iha negosiu nomos abuzu poder”.

Ministru ba Assuntus Parlamentares nomos ba komunikasaun Social, Francisco Jeronimo, dehan ba Lusa katak akuzasaun sira ne’e falsu no nia akuza ajentes KAK nian katak  sira nia atuasaun ho “falta etika”no rejeita kualker akuzasaun.

“Akuzasaun sira ne’e falsu. Laiha favoresimentu ka abuzu poder. Regras, lei sira no regulamentus provisionamentu nia ami halo tuir ho normalidade”, nia dehan.

“Hau laiha komentariu kona ba detensaun sira ne’e. Hau akompanha hela kazu ida ne’e ba hau percebe saída maka akontese. Se KAK iha evidensia, ita sei hare’e”, remata ministro Jeronimo. 

Foto, KAK, Facebook