Eis Konsuladu iha Austrália Krítika Ministra Adaljiza

Timor Post - Jaime Pires

DILI (timorpost.com) – Eis Konsuladu Jerál iha Austrália, Luciano da Conceição “Timor Maubere”, krítika Ministra Negósiu Estranjeiru no Kooperasaun, Adlajiza Magno, nia servisu.

Nia hatete, Ministra ne’e boson públiku dehan nia parte mak troka tiha konta bankária Estadu nian iha Sidney  Austrália

“Hamutuk ho ha’u-nia defensór privadu Sergio Quitas, atu ko’alia aktu Ministra Negósiu Estranjeiru no Kooperasaun, Adaljiza Magno, hodi estraga ha’u-nia naran pesoál iha Públiku no mós imajen Timor-Leste nian iha Austrália,” nia hateten liuhusi Konferénsia Imprensa iha Bidau Lecidere, Kinta (27/10).

Nia dehan, konta bankária Estadu Timor-Leste nian iha Sidney Austrália loke dezde ínisu iha 2003, konta bankária nia númeru mak nafatin ne’e. Hahú husi 16 fulan Jullu 2019 nia parte ba assume hanesan Konsul Jerál iha Austrália, konta bankária mak ne’e nafatin.

“Iha loron 04 fulan Outubru ne’e ha’u ho ha’u- nia defensór hatama ona ami-nia petisaun hasoru Ministra, kona-ba lia bosok ka lia falsu sira ne’ebé Sua-Exelénsia Ministra Adaljiza, hato’o ba iha Públiku, prosesu ne’e sei la’o, iha tempu badak nia laran Tribunál sei bola ba hatán,” hateten nia.

Nia subliña, tanba konta bankária ne’e loke tinan kleur tiha ona, molok nia ba servisu iha ne’ebá, kada tinan osan tama iha konta bankária ne’e, maibé dehan troka ne’e oinsá, dokumentu komprovativu sira mak iha liman ne’e bele haree.

“Dokumentu sira ne’e iha ami-nia liman, atu nune’e responsabiliza, señora Ministra dehan ha’u troka konta bankária, entaun konta bankária foun mak ida ne’ebé no osan tama iha ne’ebé, tanba depois de fulan lima osan tama nafatin iha konta bankária tuan ne’e to’o agora ha’u sai mós osan tama nafatin,” nia deklara.

Portantu liga ho kestaun ne’e, iha Sesta (28/10), Jornalista Timor Post, tenta konhrma ho Ministra Adaljiza Magno, iha edifísiu Ministériu Finansas, Ai-tarak laran, maibé lakohi responde deklarasaun Eis Konsuladu iha Sidney Austrália ne’e nian.

“Ha’u labele halo komentáriu kona-ba ida ne’e, se nia prosesu ona atu hasoru ha’u, ha’u labele halo Responde kona-ba ida ne’e,” hatán Ministra Adaljiza.