CAC detein suspeitu na'in-rua ba kazu instalasaun projetu Set-Top Box

DILI, 12 outubru 2022 (TATOLI)- Comição Anti Corrupção (CAC), kuarta (12/10) ne'e, ezekuta mandadu Tribunál Distritál Dili (TDD), hodi hala'o buska domisiliáriu, detensaun no apreensaun ba suspeitu na'in-rua, tanba deskonfia envolve direta ba prosesu instalasaun projetu Set- Top Box ba Rádiu Televizaun Timor-Leste, Empreza Públiku (RTTL, E.P).

Suspeitu GPdS nu'udar asesesór ba área planu programa no forsa traballu iha Ministériu Asuntu Parlamentár no Komunikasaun Sosiál (MAPKOMS) no suspeita MFC iha servisu fatin Federasaun Futeból Timor-Leste (FFTL), nu'udár na'in ba empreza Dili Enternal Innovation Information, Lda.

Hafoin halo detensaun, ekipa CAC kontinua akompaña suspeitu na'in-rua bá nia rezidénsia iha área Vila-Verde, Dili no munisípiu Liquiça, hodi halo apreensaun ba dokumentu sira hanesan evidénsia no karreta privadu ida.

"CAC simu mandadu detensaun, apreensaun no buska domisiliáriu hosi tribunál ho baze ba pedidu hosi Ministériu Públiku atu kontinua hakle'an prosesu investigasaun ba kazu ne'e.

Nune'e, ohin ita kumpre mandadu buska, detensaun no apreensaun ba suspeitu na'in-rua tanba envolve direta iha kazu instalasaun projetu Set-Box," hateten Pontu VogálCAC, Euclides Vidál Madeira, ba jornalista iha edifísiu CAC,Faról-Dili. 

CAC inisia prosesu investigasaun ba kazu instalasaun projetu Set- Top Box, hahú iha tinan 2021 no remete rezultadu ba Ministériu Públiku (MP). Nune'e, iha 26 setembru 2022, CAC ofisialmente simu mandadu buska, apreensaun no halo detensaun durante oras 72.

Nia afirma, evidénsia hanesan dokumentu no karreta privadu inklui seluk, ne'ebé ekipa CAC halo apreensaun atu ajuda ba iha prosesu investigasaun tuir-mai.

Daudaun ne'e, suspeitu GPdS no MFC ekipa konjuta detein ona iha sala detensaun CAC hodi kumpre oras 72, hafoin submete ona ba interrogatóriu dahuluk iha Tribunál Distritál Dili (TDD).

"Suspeitu sira ne'e, ita lori mai ami nia fatin CAC hodi detein sira, durante oras 72 tuir mandadu haruka, hafoin submete ba interrogatóriu dahuluk, iha loron sesta-feira, (14/11)," akresenta.

Jornalista: Natalino Costa

Foto, Facebook