Alkatiri husu timor oan respeita Vaticano kona ba alegasaun abuzu seksual husi Ximenes Belo

Timor Hau Nian Doben

Iha entrevista ida ba Lusa, sekretariu geral Fretilin nian, Mari Alkatiri, husu ba sarani timor oan respeita pozisaun Vaticano nian kona ba alegasaun sira katak Dom Ximenes Belo halo abuzu seksual ba labarik sira iha Timor iha dekada 1980 no 1990.

“Igreja Katolika instituisaun milenar ida (tuan) ke hatene jere sira nia problema interno no sarani sira tenki fiar Vaticano hodi hetan solusaun ida ke diak para assuntu ida ne’e”, dehan Alkatiri ba Lusa.

Vaticano fo’o ona “Kastigus” ba Dom Ximenes Belo no prosesu kona alegasaun seksual hasoru labarik sira husi parte Bispo Belo  iha Timor-Leste  hotu ona, bele rona  iha ne’e.

“Ami la ba halo prosesu nem ida tan. Estado la ba halo tan prosesu  tanba krimes sira ne’e prescreve ona, tanba komete kleur ona, tinan 20 liu ba, nomos tanba iha parte Santa Sé hotu-hotu julga no deside ona. Desizaun sira ne’e bispo aseita tiha ona no ita tenke respeita, respeita bispo nomos respeita desizaun hosi Vaticano”, dehan Marco Sprizzi , representante Vaticano nian.

"Kastigus” Vaticano aplika ba Amu Belo laos tanba notisia hosi revista holandesa, kastigus sira ne’e sira aplika ona ba Ximenes Belo iha tinan 2020 no reforsa tan  iha 2021 “tanba kazu ne’e seriu tebes no krimes ke amu komente sira krimes graves”,  Sprizzi haktuir.

Vaticano aplika ona " Kastigus" ba Amu Belo no nia aseita, "kastigus" maka: Amu Belo labele iha kontakto voluntariu ho labarik menoridade sira, no labele mos iha kontakto ka fila ba Timor-Leste. Reprezentante Santa Sé explika katak “ kastigus” sira ne’e “todan tebes maibe kazu ida ne’e seriu tebes no krimes graves”.

Mari Alkatiri dehan tan ba Lusa katak, “Timor-Leste nasaun maioritariamente Katolika no tenki respeita ida ne’e”.

“D. Ximenes iha ninia kontribuisaun rasik ba luta libertasaun no ema nem ida bele nega ida ne’e”, remata Mari Alkatiri.