Ramos-Horta insulta tan UNTL no estudantes

Opinião hosi  Maubere Tuba Rai Metin

Horseik iha debate entre kandidatu prezidensial nain rua, ita nian Prémio Nobel da Paz José Ramos-Horta dala ida tan uza insultu hanesan nia “kilat” hodi halo kampanha eleitoral, nia  insulta Lu-Olo nomos insulta UNTL no universidade ne’e nia estudantes no dosentes. 

Nia dehan nia halimar maibe Ramos-Horta ema boot ona, labele ba televizaun nasional no halo insultu hodi halimar fali, imi devia sai ezemplu ba jerasaun foun laos halimar jogu insulta malu, moe laiha.

Ramos-Horta hatete ba Lu-Olo, “ Hau hatete ita nia interpretasaun ne’ebe mai karik hosi UNTL, hau agora desconfia ona UNTL no ema hasai kursu Direito iha UNTL hau la rekruta too tama iha Prezidensia”.

Maka ne’e Ramos-Horta, ita boot lalika soe rai-henek ba ami nia matan, ami hatene ona katak ita sei sai Prezidente ita nunca iha intensaun hodi rekruta Maubere Oan ba servisu iha Prezidensia. Bainhira ita boot Prezidente da Republika ita boot nia assessor, staff no TBO sira maioria mai hosi rai liur. Balun beik tebes maibe malae nia servisu maka diak los, hanoin ema kolonialista sira. 

Ramos-Horta sei moris ho kolonialismu iha ninia kakutak no hanoin ita Povu hanesan ita beik, maibe beik boot maka se? 

Horseik Timor Oan ida hosi UNTL fo’o “porrada” ba Ramos-Horta, porrada laos ho atus maibe ho matenek, matenek boot. Francisco Guterres Lu-Olo manan debate horseik, nia soe dok tebes Ramos-Horta. 

Ramos-Horta besik kandidatu Lu-Olo, Ramos-Horta hanesan labarik kikoan ke tenki aprende hosi nia mestre Lu-Olo. Atual Prezidente hanesan xefi Estado laos hanesan Horta ke hatudu ke la preparado ba debate, la hatene halo interpretasaun ba ita nia Konstituisaun. Ramos-Horta tenki ba estuda lae ita nia Konstituisaun, ita la hakarak ema ho kursu boot hosi rai liur ba tur iha kadeira Palasio Prezidensial maibe la hatene interpreta ita nia Konstituisaun rasik, maka lae duni.

Triste tebes haree Horta estuda ita nia Konstituisaun iha televizaun nasional, triste tebes. La hatene interpreta Konstituisaun no nia insulta fali instituisaun UNTL, moe laiha ona karik?

Sr. Ramos-Horta, lalika hanehan ita nia oan sira ke estuda iha UNTL, lolos ita tenki orgulho, tanba sira maka jerasaun foun, loron ida sira maka sei ukun ita.

Ita harohan hodi estudantes UNTL nian sei halo banati tuir Dr. Lu-Olo no la banati tuir Ramos-Horta ke ema arrogante ida ke hanoin nia boot liu ema hotu no senti katak nia bele insulta Povu Maubere tuir nia hakarak. 

Imi hanesan estudantes no dosente sira hosi UNTL labele vota ba Ramos-Horta maibe foo imi nia votu ba Lu-Olo. To’o ona ema foo valor ba ema hosi rai liur no nafatin hanehan no sama Povu Maubere. To’o ona!

Fo’o lima ba malu no vota ba Lu-Olo, mai ita dehan lae ba Ramos-Horta, dehan lae ba kolonialismu foun iha ita nia rai.

LAE! LAE! LAE!